“Nous mongolia”-аас зохион байгуулдаг 6.45-ын лекц энэ удаа оройны 6.45 цагт болсноороо онцлог байлаа. Лекцийн зочноор Монгол Улсын Ерөнхийлөгчийн Тамгын газрын дарга асан, Монгол улсын эдийн засгийн бодлого, өрсөлдөх чадварын судалгааны төвийн үүсгэн байгуулагч, Удирдах зөвлөлийн дарга Пунцагийн Цагаан оролцсон билээ.
Мөрөөдлөө биелүүлэхийн тулд юу хийх ёстой, юуг мөрөөдөх ёстойг биш юу хийх ёстойг, юу хийвэл илүү амжилтад хүрэх тухай өөрийн туршлага, арвин их мэдлэгээс ирсэн зочдод хуваалцсан юм.
Лекцийг сонирхон ирсэн хүмүүсийн 70 хувь нь залуучууд байсныг онцлох нь зөв болов уу.
Тэрээр лекцийн эхэнд Нобелийн Энх тайвны шагналыг 17 настайдаа хүртсэн Малала Юсуфзай охин, Мороккогийн хоньчин охин буюу Францын сайд Боловсролын сайд Нажат Белкасем, Германы хамгийн анхны эмэгтэй ерөнхий сайд Анжела Маркел зэрэг дэлхийн хүчирхэг эмэгтэйчүүдийн зургийг танилцуулж эмэгтэйчүүд хэрхэн мөрөөдөлдөө үнэнч байж, мөрөөдөлдөө хүрч чадсаныг сонирхуулан ярьсан юм.
Агуу хүмүүс, эрдэмтэд багадаа маш их үлгэр сонсдог байсан юм билээ. Тиймээс залуучууд хүүхдүүддээ үлгэр маш их уншиж өгч бай.
Нисдэг морины тухай сонсож уншиж өссөн хүүхэд ямарч том фантазыг хүлээж авч чаддаг. Тиймээс монголчууд оюун ухаанаараа ялгардаг.
Би Жангарыг чээжилж байсан.Ном уншихгүй л бол сэтгэхээ больчихдог. Номыг хэвшил болгох хэрэгтэй. Би 7 хоногт 1 ном уншихыг хичээдэг.
Өнөөдрийн эдийн засгийн хямрал бол засгийнчадавхийг харуулж байгаа юм. Бусдаас зээл авдаг биш, бусдад тусламж олгодог болсон цагт л эдийн засгийн тусгаар тогтнолтой болно.
Хүн бүр шүүмжлэгч болчихсон. Хүүхэд нь аав ээжийгээ, аав ээж нь хэн нэгнийг гэх мэт.
Иргэд нь олсон мөнгөө хэрхэн зарцуулах тал дээр монголчууд дутагдалтай.
Шүүмжлэхээ болиод өөрийгөө олж авах хэрэгтэй. Өөрийгөө авч яв. Бэлэнчлэх сэтгэлгээг өөгшүүлдэг зэрэг нь өнөөдрийн ийм байдалд хүргэж байна.
Багш ном 2ыг л монголчууд дээдэлдэг байсан. Хөдсөөр өөрийгөө хучсан хэрнээ номоо болохоор торгоор ороож, бурхныхаа өмнө тавьдаг. Өнөөдөр монгол боловсролоороо хамгийн дорой л явж байна. Тиймээс багшийн үнэлэмж маш чухал.
Монгол улс экспортыг дэмжих хэрэгтэй. Тэгж байж эдийн засгийн уналтаас гарна. Бизнесийг дэмжих хэрэгтэй. Бизнест засаг саад хийхээ болих хэрэгтэй. Хөрөнгө оруулалт дэмжих нь зүйтэй. 500 мянган чанартай ажлын байр гаргахад л Монгол сэрнэ. Гадны хөрөнгө оруулалтыг тат л даа.
Дэлхий дээр 200 гаруй улс хөгжиж байхад Яамныхаа нэрийг солиод л байгаад байж болохгүй шүү дээ.
Монголчууд монголоосоо дайжихаа болих хэрэгтэй. Монголын баячууд Англид байна. Үндэсний хөрөнгөтнүүд эх орноосоо дайжихыг Африкийн зам гээд байгаа юм.
Тэрээр лекцийн төгсгөлд “Алтыг бол ухаад л дуусгачихна. Харин хадны сүг зургийг хэдэн ч жил хэдэн ч хүнд харуулж болно. Хадны сүг зураг нь 200 орчим мянган жилийн түүхтэй. Хадны зургийг хүн төрөлхтний давтагдашгүй соёлын өв гэж эрдэмтэд үздэг. Тиймээс би надаас асуулт асуусан болон миний асуултад зөв хариулж чадсан хүмүүст баруун 4 аймгийн уул ус, хадны сүг зургуудыг багтаасан номыг бэлэглэе” хэмээн бэлэг бэлгийн дээд ном, тэр дундаа Монгол эх орныхоо түүхэн онцлогийг харуулсан номыг бэлэглэсэн билээ.
NOUS MONGOLIA”-аас нийт 24 лекц уулзалтыг зохион байгуулсан бөгөөд 2016 оныхоо сүүлчийн лекцийг оройны 6.45 цагт зохион байгуулж энэ жилийнхээ оюуны их давалгааг ийнхүү өндөрлөлөө.
Олон олон залууст урам зориг өгч, ирээдүй рүү тэмүүлсэн оргилсон их хүслиийг нь дэмжиж ажилладаг нийгэмд оюуны их хөрөнгө оруулалтын цогцыг түгээж буй “NOUS MONGOLIA”-ийн хамт олондоо талархал илэрхийлье. Олон зуун залуус дараа дараагийн үйл ажиллагаануудыг хүлээж байгаа гэдэгт итгэлтэй байна.
О.НАНСАЛМАА