Хүн амын хөгжил, нийгмийн хамгааллын сайд Н.Номтойбаяр ахмад настны тэтгэврийг багаар тогтоочихоод, бичилт хийхдээ өндрөөр тавьж, зөрүүг нь хумсалдаг хулгайтай тэмцэхээ өчигдөр мэдэгдлээ.
Тэтгэвэр олгодог банкны нэгхэн салбар дээр 187 орчим сая төгрөгийн зөрчил илэрсэн ноцтой баримтыг сайд хэллээ. Салбарын яамнаас гаргасан статистик мэдээгээр өнгөрсөн арваннэгдүгээр сарын байдлаар улсын хэмжээнд 332 мянган ахмад настан тэтгэвэр авч байна. Тэтгэвэр олгох бүрийд сар тутамд 113 тэрбум төгрөг зарцуулдаг. Харин эл мөнгөний хэдэн хувь нь ахмадуудад хүрч, хэд нь дундаас нь алга болж, буруу замаар оров гэдэг одоо хийж байгаа шалгалтын дүн эцэслэгдэхэд тодорхой болох юм.
Удахгүй ахмад настнуудад тэтгэврээ дахин тогтоолгох аян зарлах нь. Ингэснээр буруу тогтоосон тэтгэврээ үнэн зөвөөр тогтоолгох боломжийг ахмад настнуудад олгоно. Ажилласан жилээ дарагдуулж, хохирч яваа хэчнээн ахмад настан бийг одоогоор хэлэх боломжгүй ч тэтгэврээ дахин тогтоолгосноор нэг хэсэг нь эргэлзээгээ тайлж, мөн нэг хэсэг нь тэтгэврээ үнэн зөвөөр тогтоолгож, авах боломжтой болно. Энэ аян ахмад настнуудад Засгийн газраас тэтгэврийг нь нэмэгдүүлэх шийдвэр гаргасантай дүйцэхүйц арга хэмжээ болж буух нь дамжиггүй.
Д.БУЯНЖАРГАЛ