Цахим сүлжээнд олон нийтийн анхаарлыг татаад байсан МУСТА, дуучин Э.Төрмандахын “Аархал” дууг дуулсан жаалхүү А.Өсөх-Ирээдүй өөрийн эгч, ах хоёртой хамтран “Удам залгасан аялгуу” тоглолтоо хийхээр болжээ.
Бяцхан дуучдын тоглолт энэ сарын 9-нд 18.20 цагт Увс аймгийн “Ойрад” театрт болох юм байна. МУСТА, дуучин Э.Төрмандах Увс нутгийн хүргэн аж. 2014 онд олон нийтэд цацагдаж шуугиан тарьсан А.Өсөх-Ирээдүй хүүгийн бичлэгийг Э.Төрмандах гар утсаараа бичиж, интернэтэд байршуулжээ. Амарсайханых гэдэг айл 2 хүү 2 охинтой юмсанж. Увс нуурын баруун эрэг даган хот айл болон суурьших энэ сайхан айл урлаг уран сайханд дуртай, хүүхдүүд нь бүгд дуулж хуурддаг. Том охин нь 2014 онд “ТВ9” телевизээс зохион байгуулдаг “Гэгээн алсын одод” нэвтрүүлэгт оролцож шилдэг 20 хүүхдийн нэгд шалгарч байж.
Д.БУЯНЖАРГАЛ