МАН-ын Бага хурал өнөөдөр болно. Хэлэлцэх хамгийн гол асуудал нь генсек хэн болох вэ гэдгийг сонгох юм байна. Одоогоор тус намын Нарийн бичгийн дарга асан Д.Амарбаясгалан МАН-ын генсекийн үүрэг гүйцэтгэгчээр ажиллаж байгаа. Сонгуулийн дараахан түүнийг үүрэг гүйцэтгэгчээр томилох үед “...Удахгүй жинхэлнэ” гэцгээж байсан юм.
Тэгвэл өнөөдрийн Бага хурлын генсекийг сонгох сонгуульд хэд хэдэн хүн нэрээ дэвшүүлэхээр болсон байна. Мэдээж хэрэг, одоо үүрэг гүйцэтгэж буй Д.Амарбаясгалан, мөн Зам тээврийн сайд асан, “Өндөр буянт”-ын Н.Төмөрхүү, Барилга, хот байгуулалтын дэд сайдад нэр дэвшиж байсан, “Сөүл”группийн захирал Н.Өнөрболор, Чингэлтэй дүүргийн Засаг дарга асан Б.Баярмагнай, Унгарт Элчингээр сууж байгаад ирсэн, УИХ, Засгийн газрын гишүүн асан Т.Ганди нар хүч үзэхээр хэдэн сар бэлтгэж байгаа гэнэ. Гэхдээ хамгийн идэвхтэй өрсөлдөхөөр зүтгэж байгаа нь Н.Төмөрхүү, Б.Баярмагнай хоёр гэдгийг тус намд ойр эх сурвалжууд хэлж байгаа юм. Бас нэгэн мэдээллээр, Н.Төмөрхүү хурал дээр генсекийн төлөөх өрсөлдөөнөөс нэрээ татах магадлал нэлээд өндөр болсон байна. Тэрээр хэд хоногийн өмнө Д.Амарбаясгалантай уулзаад тохироо хийсэн гэж байгаа юм. Энэ мэтчилэн МАН-ын генсекийн суудлын төлөөх өрсөлдөөн тодорхой хүрээнд болохоор дуулдаж байна. Гэхдээ ширүүн өрсөлдөөн болно гэж хэлэхэд хэцүү. Учир нь одоогийн үүрэг гүйцэтгэгч Д.Амарбаясгалан олонхийн дэмжлэгийг авах магадлал өндөр байгаа ажээ. Тиймээс ч МАН-ын Бага хурлын төлөөлөгчдийн дунд “Генсек хэн болох нь тодорхой шүү дээ” гэх хандлага өчигдөр орой хүртэл дийлж байсан юм.
Нөгөө талаар дээр дурдсанчлан Д.Амарбаясгалан сонгуулийн маргааш л Ж.Мөнхбатын дараа намын генсек болох хүнээр тодорч, албан бусаар түр орлож очсон. Гэвч өнөөдөр Д.Амарбаясгалантай өрсөлдөх нэлээд хэдэн хүний нэр гарч байгаа нь тодорхой шалтгаантай. Шуудхан хэлэхэд сүүлийн үед нуухаа болиод байгаа нам доторх сөргөлдөөн, тэмцэлдээнтэй холбоотой. Гэхдээ энэ зөрчлийн туйлын зорилго нь генсекийн суудал биш учраас фракцууд хүнээ нэр дэвшүүлэх ч Д.Амарбаясгалан генсекээр сонгогдоно гэсэн үг.
Эх сурвалж : “Зууны мэдээ” сонин