Манай дарга нар гадаадад айлчлах дуртай. Айлчлалынхаа үеэр болсон болоогүй гэрээнд гарын үсэг зурдаг. Түүнийгээ ажил хэрэг болгоогүй байж дараагийн айлчлал залгадаг нь шүүмжлэл дагуулж эхэллээ. Ийм үйлдэл нэг бус удаа давтагдаж буй учраас дипломат ёс гэж ёсорхолгүйгээр Монголын төр засагт шүүмжлэлтэй хандах болсноо гадныхан илэрхийлэх болсон байна.
Тухайлбал, Сангийн сайд Чойжилсүрэн, УИХ-ын гишүүн Х.Нямбаатар, Г.Тэмүүлэн тэргүүтэй төр,засгийн өндөр албан тушаалтнуудыг Японд айлчлахад ийм сануулгыг өгчээ. Японы хөрөнгө оруулалтаар барих 5-р цахилгаан станц зогссон. Японы Сумитоми компани шалгарч, ТЭЗҮ-гээ хийж, хөрөнгө оруулалтаа босгосноос хойш сураггүй. Өөр олон жишээг дурдсан байна. 2016 онд гэхэд л, Монгол улсын ерөнхийлөгч Ц.Элбэгдорж, ерөнхий сайд Ч.Сайханбилэг, УИХ-ын дарга З.Энхболд нар шил дараалан Япон улсад айлчилсан. Хамгийн өндөр түвшинд хийсэн айлчлалын хүрээнд гэрээ хэлэлцээр хийсэн. Мөн л замхарсан. Монгол гаргасан шийдвэрээ хэрэгжүүлдэггүй, ярьсан хэлсэндээ байдаггүй, төрийн залгамж чанаргүй.
Ийм шүүмжлэлийг гишүүд чихээ халууцуулан сонсож ирсэн байна. Гаднын хөрөнгө оруулагчдын итгэлийг алдсан. Гэвч бас найдлага үлдсэн гэнэ. Монгол улс дүрэмтэй болж, дүрмийн дагуу тогловол боломж бас сонирхол байгааг үгүйсгээгүй байна.
Ц.ХИШГЭЭ