.jpg)
Манай улсын оюуны спортын баг Ой тогтоолтын дэлхийн аварга шалгаруулах тэмцээнд 2011 онд багаараа оролцсоноос хойш тогтмол эхний гуравт орсон бөгөөд одоогоор олон улсын оюуны спортын 40 тэмцээнд оролцож 539 медаль хүртэн, дэлхийн дээд амжилтуудыг шинэчлэн тогтоосоор байна. Уг тэмцээний оролцогчид нь тодорхой дүрмийн дагуу өгөгдсөн их хэмжээний мэдээллүүдээс аль болох олныг цээжилж эргүүлэн санаж өрсөлддөг спортыг ой тогтоолтын буюу оюуны спорт юм.
1991 оноос албан ёсоор хөгжиж эхэлсэн энэ спортын ДАШТ 25 дахь удаагаа болох гэж байна. Ой тогтоолтын дэлхийн аварга шалгаруулах тэмцээн ирэх долоо хоногт буюу энэ сарын 14-18-нд Сингапурт болох аж. Тэмцээнд оролцохоор “Монголын оюун ухааны академи”-ийн тамирчин, багш дасгалжуулагчид эх орноосоо мордлоо.
ДАШТ-нд 60 орны 200 тамирчин харааны болон сонсголын ой тогтоолтын үндсэн 10 төрлөөр бага, өсвөр, насанд хүрэгчдийн ангилалд өрсөлдөж шилдгүүдээ тодруулна. Манай багт ахлах дасгалжуулагч Б.Баасандорж, багш, дасгалжуулагч Б.Баярмаа нараар ахлуулан, 10-24 насны 23 тамирчин оролцоно.Нэг онцлох зүйл бол багийн бүрэлдэхүүнд 2016 оны ой тогтоолтын улсын аваргын тэмцээнд амжилттай оролцсон Дархан-Уул болон Орхон аймгийн тамирчид оролцож байгаа юм.
Д.БУЯНЖАРГАЛ
