.JPG)
Монголын эдийн засаг, санхүүгийн байдал нэгэнт хүндэрчээ. Түүнийг нуух шаардлагагүй болсон байна. Эрх баригчид сандралдан тал тал тийшээ мөнгөний эрэлд мордоцгоосон. Голдуу л "Монголчууд та нар худалч, ажил хэрэгч биш, амласандаа хүрдэггүй, муридаг, хариуцлагагүй" гэсэн таагүй, гэхдээ үнэн үгийг гадаад ертөнцөөс чихээ халууцталаа сонсож явна. Энэ бол Монголын төр, засаг буюу, улс төрчдөд хандаж хэлсэн үг. Ялангуяа хоёр хөрш ийм үг хэлэхийн зэрэгцээ, сануулга ч өглөө.
Гуравдахь хөрш гэдэг япончууд ч гэсэн тэссэнгүй. Эх орондоо үлдсэн хэсэг нь, санхүүгийн байдал хэвийн байгаа мэт сэтгэгдэл төрүүлэхийг хичээж байна. Тэд болгоомжилж байна. Юунаас вэ, тэгвэл. Олныг хамарсан үймээн самуун дэгдэх бий гэдгээс ихээхэн болгоомжилж, аль болох ард иргэдийг тайвшруулах амь тариаг хийж байх шиг санагдах болов.
Гэвч, Ч.Улаан, Б.Жаргалсайхан, Баярхүү нарын эдийн засагчид монголын санхүүгийн систем нурж эхэлснийг, цаг алдаж болохгүйг сануулсаар байна. Улс орон нь өрөнд баригдаж, ард иргэд ядуусын эгнээнд олноороо гулсан унаж, өлмөн зэлмэн амьдралтай золгосон нь факт.
.JPG)
Тэгтэл, С.Баярцогтоос өгсүүлээд сая сая ам.доллараа мартаж орхидог улс төрчид санасандаа хүрч, сарвайснаа авсаар байгаа нь нийгмийн дургүйцлийг улам өдөөлөө. Баярцогтоос болоод, Эрдэнэтийн 49%-ийг "дээрэмдсэн" улс төрчдийн баг ч ихээхэн болгоомжилж, Эрдэнэтийн 49%-ийг авснаас хойш Эрдэнэт Үйлдвэр шилэн болсон тухай улиг болсон үлгэрээ давтаж эхэллээ.
Эрх баригчид, бүлэглэл ихээхэн болгоомжилж байна. Тэд улс орны эдийн засгийг өөд нь татах, ард иргэдийн амьдрал ахуйг дээшлүүлэхэд тэгтлээ санаа зовохгүй байгаа хэрнээ ганцхан зүйлд санаа зовох маягтай. Тэд тайван байхыг, тэднийг тайван байлгахыг хүсэж байна. Эрх баригчид, эрх мэдэлтнүүд ганцхан зүйлээс болгоомжилдог. Тэр бол ард түмэн. Солонгосын ард иргэд шиг шударга үнэний төлөө хүчээ, дуу хоолойгоо нэгтгэх вий гэдгээс чичирч эхэлжээ. Үүн дээр нь С.Баярцогтын Монгол улсаасаа баян болсон мэдээлэл дайран дээр давс асгах шиг болжээ. Монгол орон маань баян, ядуугийн туйлд хүрчээ. Хоёр нутагтан, торго, долларт хөлбөрөгч цөөхөн баячууд, эх орондоо гуйлгачин болтлоо хөдөлмөрлөсөн ард олон гэсэн хоёр ангид хуваагджээ. Ард иргэд насаараа хөдөлмөрлөөд ядуурсаар байхад, юу ч хийгээгүй, юу ч бүтээгээгүй Баярцогттонгууд хөлжээ. Ийм нийгмийг монголчууд хүсээ гэж үү..
Аналист Ц.ЭНХБАТ
