Одоогоор Улаанбаатар хотод 25 тоглоомын газар ажилладаг. Хууль зүй, дотоод хэргийн сайдын тушаалаар ЭЦГ-ын Зохион байгуулалттай гэмт хэрэгтэй тэмцэх хэлтсийн ажилтнууд энэ сарын 14-28-ны өдрүүдэд шалгалт хийсэн бөгөөд зөвшөөрөгдсөнөөс өөр үйл ажиллагаа явуулсан зөрчил илэрсэн байна. Автомат тоглоомын газруудын зөвшөөрлийг жил гаруйн өмнө Нийслэлийн Соёл урлагийн газрын даргаар ажиллаж байсан Б.Батцэнгэл олгосон байдаг. Харин зөвшөөрөл ёсоор бол дээрх газрууд кино театруудын доор байрладаг шиг автомат тоглоомын газар ажиллуулах ёстой боловч мөрийтэй тоглуулж байсан нь шалгалтаар илэрч, 16 автомат тоглоомын төвийн эздэд Эрүүгийн хэрэг үүсгэн шалгаж байна.
Хууль бусаар автомат тоглоомын газар ажиллуулж байсан учраас Эрүүгийн хуулийн тусгай ангийн 243 дугаар зүйл ангид заасны дагуу ААН-ийг хөдөлмөрийн хөлсний доод хэмжээг 5-50 дахин нэмэгдүүлсэнтэй тэнцэх хэмжээний мөнгөн торгууль ногдуулдаг юм байна.
Д.БУЯНЖАРГАЛ
