Монголын дөрвөн ерөнхийлөгч түүхэндээ анх удаа хамтдаа мэндчилгээ дэвшүүллээ. Дүрсийг нь харвал, нэг л албадмал, хиймэл, халуун дулаан уур амьсгал үгүйлэгдсэн, ач холбогдол багатай, ёстой л ПИАР төдий мэндчилгээ болжээ гэж ажиглав. Хэзээ ч нэг дор сууж үзээгүй хүмүүсийг нэгтгэж чадсан нь Ц.Элбэгдоржийн гавьяа юм шиг. Тэр нэгэн уламжлалыг тогтоохыг хүсэв бололтой. Тэр бол жил бүрийн шинэ жилээр хамтдаа мэндчилгээ дэвшүүлж байх уламжлал. Үүнийг тэр бусдадаа биш, өөртөө зориуллаа гэж хэлэх нэгэн ч байна. Яагаад гэвэл, дараа жилийн шинэ жилээр тэр өөрөө байхгүй гэдгээ мэдэрсэн. Тэгэхээр, тэр дараа жилийн шинэ жилээр бусад ерөнхийлөгчтэй зэрэгцэж сууж байгаад Монголын ард түмэндээ мэндчилгээ дэвшүүлэх хүсэлтэй байгаа юм байна гэж ойлголоо. Мөн цагаан сараар ч, Ц.Элбэгдорж бусадтайгаа хамт мэндчилгээ дэвшүүлж магадгүй. Тэгэж чадвал, түүнд жил жилийн цагаан сараар мэндчилгээ дэвшүүлэх бололцоо нээгдэнэ. Тиймээс энэ удаагийн мэндчилгээ, хэдийгээр авцалдаа муутай байсан ч, Ц.Элбэгдоржийн ирээдүйгээ харж хийсэн ПИАР чанартай нэгэн алхам байлаа гэж дүгнэж болох юм.
Ийнхүү, ХЭЭГҮЙ Очирбат, ХИЙГҮЙ Баганбанди, ХИЙДЭГ Энхбаяр, ХЭЛДЭГ Элбэгдорж нарын шинэ жилийн мэндчилгээ цацагдлаа. Улс орон өрөнд баригдаж, сайн сайхны тухай ганцаараа ярих нь зохимжгүй гэсэн тактик ч байсныг бас үгүйсгэж болохгүй.
Аналист Ц.ЭНХБАТ
