Сонгуулийн өмнө гэнэт л малчны бэлчээрээс Ц.Амгаланбаатар, Б.Содномдаржаа, Т.Чимгээ нарыг баривчлан хорьж 8 сар шалгасны эцэст 24-25 жилийн чанга дэглэмд хорих ялаар шийтгэсэн шийдвэрийг шүүхээс гаргалаа.
С.Оюуны зүгээс шүүх хурлыг нээлттэй явуулахыг хүссэн боловч, шүүх хүлээн авсангүй. Сонгуулийн дараа Э.Бат-Үүлийг хэрэгт холбогдуулан дуудаж байцаалт аван түүнийг сандаргасан. Шүүх хурал эцсийн шийдвэрээ танилцуулснаар, цаашид С.Зоригийн хэрэгт хэн нэгэн улс төрчийг холбох сэжмийг бүрмөсөн тасаллаа гэж ажиглагчид дүгнэлээ.
Харин ял авсан малчдын ар гэрийнхэн эсэргүүцсээр байгаа. Аллага үйлдсэн өдөр тэдгээр малчид мал дээрээсээ холдоогүй гэж баталж буй ч шүүхийнхэн хангалттай нотолгоо гэж үзээгүй бололтой. Ийнхүү 18 жилийн турш улс төрийн тоглоомын томоохон өрөг болж ирсэн С.Зоригийн хэргийн ялыг ЦАмгаланбаатар, Б.Содномдаржаа, Т.Чимгээ нарын малчин залууст тохлоо гэж ар гэрийнхэн нь эсэргүүцлээ илэрхийллээ. Ямар ч байсан С.Зоригийн дуулиант хэрэг, намуухан хаагдав. Зоригийн ах дүүгийн зүгээс ямар нэгэн байр суурийг огт илэрхийлсэнгүй.
.jpg)
Харин Б.Содномдаржаагийн ээж, "Шударга шүүх гэж үнэхээр байхаа больжээ. Би энэ хэргийг шударга шүүх байх гэж хүлээцтэй хүлээж байсан. Шударга шүүгч байсангүй, шударга төр ч гэж алга болжээ. Ингээд дуусч байгаа юм байна. Аллага болдог гэдэг өдөр, хоногуудад, С.Зоригийг алах байтугай, цаг завгүй өвс хадлан, хашаа хороо гээд өвлийн бэлтгэлээ базаагаад завгүй байсан. Дэндүү гүтгэж байна. Элбэгдоржийн үүргийг шүүгчид биелүүллээ" гэж шүүх хурлын дараа хэвлэлийнхэнд хандаж гомдлоо барлаа.
Э.ҮҮЛЭНЦЭЦЭГ
