Шинэ он гардгаараа гарч, анхны нар манддагаараа мандлаа. Тэгвэл 2017 оны улс төрийн хамгийн том үйл явдал бол Монгол улсын ерөнхийлөгчийн сонгууль. Монголын 4 дэх ерөнхийлөгч Ц.Элбэгдоржийн 8 жилийн хаанчлал дуусч, түүний халааг "шинэ" хүн хүлээн авна. Уламжлал ёсоор 5-р сарын сүүлээр сонгуулиа хийнэ гэж тооцвол, ердөө л 150 хоног хүрэхгүй хугацааны дараа Монголын төрийн шинэ наран мандана.
Ердөө л гуравхан сонголттой. МАН, АН, МАХН гэсэн УИХ-д суудалтай улс төрийн намаас нэр дэвшүүлэх эрхтэй. Гэхдээ МАХН нэр дэвшүүлэх эрхтэй ч, одоогоор хэр зэрэг идэвхтэй оролцох нь тодорхой бус байгаа. Тиймээс ч, намын дарга Н.Энхбаярын хүсэл сонирхолтой туйлын холбоотой гэдгийг улс төр судлаачид тодотгодог. Гэхдээ МАХН ямар тоглолт хийх байснаас үл хамаарч, гол өрсөлдөөн МАН ба АН-ын нэр дэвшигчдийн хооронд болно гэдгийг үгүйсгэж болохгүй. Шүүгчид шударга биш болсон, хууль хүчнийхэн захиалгаар үйлчилдэг болсон гэдэг шүүмжлэлийг Ц.Элбэгдорж ерөнхийлөгчийн үлдээсэн сүүдэр гэж тодотгох болсон. Тэгэхээр шударга ёсыг шударгаар тогтоох хүн бэ? гэдгийг иргэд хүсэн хүлээж байна. Энэ тодотгол, шалгуурт дээрх 3 намаас нэр дэвшигчдийн хэн нь илүү нийцэх вэ? гэдэг маш чухал үзүүлэлт болно. Хэдийгээр таахад эрт байгаа ч, МАН-аас нэр дэвшигч илүү шанстай гэж улс төр судлаачид хэлж буйг анзаарахгүй өнгөрч болохгүй. Гэвч хугацаа байна...
Аналист Ц.ЭНХБАТ