Бусдын эд хөрөнгийг залилан мэхэлж авсан хэрэгт холбогдон шалгагдаж байгаад сураггүй болсон “Гандан бороо” хочтой Ч.Батхуягийг цагдаагийнхан өнгөрсөн аравдугаар сард гэрээс нь баривчилсан. Тухайн үед тэрээр мансууруулах бодис хэрэглэсэн байсан бөгөөд шинжилгээгээр “мөс” буюу метамфетамины төрлийн бодис илэрсний зэрэгцээ гэрээс нь тухайн хар тамхи гарсан байдаг. Түүнд дээрх хоёр үндэслэлээр эрүүгийн хэрэг үүсгэн шалгахдаа цагдан хорьсон бөгөөд шүүгчийн захирамжаар батлан даалтад гараад сураггүй болжээ. Тиймээс цагдаагийнхан эрэн сурвалжилж өнөөдөр байгаа газрыг нь тогтоон Тусгай ажиллагааны газрын ажилтнууд баривчиллаа.
Мөн өнөөдөр Сэлэнгийн гэж алдаршсан У.Баатаржавыг ШШГЕГ-ын харьяа Цагдан хорих 461 дүгээр анги рүү Тусгай ажиллагааны газрынхан хүргэж, цагдан хорилоо. Түүний дүү “Доён” хэмээх У.Болд өнгөрсөн зун Хан-Уул дүүргийн нутагт, Туул голын эрэг дээр зэвсэг хэрэглэн танхайрсан хэрэгт холбогдсон. Улмаар ах нь Туул голын эрэгт мөн л хүмүүсээр хий буудуулж, цагдаад хуурамч дуудлага өгч төөрөгдүүлсэн байдаг. Мөн нэр бүхий иргэдээс 80 сая төгрөг залилан мэхэлж авч, мөнгөө буцаан авах гэсэн хүмүүсээ дарамталсан хэрэгт тус тус буруутгагдаж байгаа юм.
Эндээс үзэхэд эрүүгийн гэмт хэрэгт удаа дараа холбогдож байсан хүмүүстэй цагдаагийн байгууллага ширүүхэн тэмцэж эхэллээ.
Ц.ХИШГЭЭ
