Эрдэнэтийн 49%-ийг нэгэн монгол залуу хувьчилж авсан асуудлыг хамгийн их улстөржүүлж, өндөр авахуулж, өөрийнхээ рэйтингийг өсгөж чадсан хүн бол УИХ-ын дэд дарга, Ц.Элбэгдоржийн хэлснээр Монголын 4 дэх дээд эрх мэдэлтэн Ц.Нямдорж байсан. Түүний ярьж хэлж байсан нь зөв байсан учраас нийгэм Ц.Нямдоржийг талархан угтсан. Гэвч төд удалгүй тэр усанд хаясан чулуу мэт сураггүй болсон. Түүнийг дарамталсан, хүүхдийнх нь асуудлыг сөхсөн, түүгээр нь нээнтэглэж амыг нь үдсэн гэдэг ам дамжсан яриа битүүхэн тарсан. Гэвч нийгмийн нэг хэсэг Ц.Нямдоржид итгэж, түүнийг өмгөөлөн хамгаалахад бэлэн байсан цаг бий. Гэвч түүний дуугүй болсон шалтгаан нь, түүнтэй өөртэй нь холбоотой болж таарлаа. Эрдэнэт бол Монгол улсыг 40 жил тэжээсэн төдийгүй, Монгол улсын 4 ерөнхийлөгч, үе үеийн ерөнхий сайд, парламентад суудалтай намууд, намын дарга нар, сайд, намын лидерүүд, тэдний гэр бүлийг тэжээж байсан түүхтэй гэдгийг Монголын нүдтэй нь харж, чихтэй нь сонссон. Тэгвэл, МАН-ын лидерүүдийн нэг, УИХ-ын дарга, Хууль зүйн сайд зэрэг төр засгийн өндөр албан тушаал хашиж ирсэн Ц.Нямдоржийн гэр бүл, үр хүүхэд ч Эрдэнэт үйлдвэрийг сааж амьдарч байсан нь ил болж эхэллээ. Их ч барьсан үмхий, бага ч барьсан үмхий гэдэг шиг, Ц.Нямдорж бас " баастай" түүхтэй ажээ. Ц. Нямдоржийн хүү, Нямдоржийн Анхбаяр гэдэг залуу аль 2006 онд л Эрдэнэт үйлдвэрт 2,5 тэрбум төгрөгийн шахаа хийж байсныг АН-ын даргад нэр дэвшигч, УИХ-ын гишүүн С.Эрдэнэ нийтэд дэлгэлээ. Ц.Нямдорж шударга царайлчихаад, өөрөө асуудалтай учир, Эрдэнэтийн 49%-ийн асуудлыг дахин сөхөхөөс " хулчийжээ".
Э.ҮҮЛЭНЦЭЦЭГ