Тэр Монголдоо амьдрах болов уу? Лав л Улаанбатарт амьдрахгүй бололтой. Тэр Улаанбаатарыг "ирээдүйгүй хот " гэж нэрлэлээ. Түүний хэлсэн энэ үг Улаанбаатар хотыг "сөнөж буй" хот гэж хэлэх шиг сонсогдлоо. Төрийн тэргүүн хүн удирдаж буй улсынхаа нийслэлийг "ирээдүйгүй хот" гэж гутаан нэрлэсэн анхны төрийн тэргүүн Ц.Элбэгдорж боллоо.
Хот утаанд дарагдаж, эрх баригчид утаанд ялагдсанд тэр буруугүй бололтой. "Муу үг модон улаатай" гэж үг бий. Түүний адил Ц.Элбэгдоржийн хэлсэн "Улаанбаатар хот ирээдүйгүй хот" гэсэн үг Монголоос хальж, дэлхийд цацагдлаа. Тэр Монголд, Улаанбаатарт хөрөнгө оруулалт хийж хэрэггүй гэдэг үгийг гадаад ертөнцөд чимээдлээ. Эх орондоо амьдрах ердийн монголчуудад хохиролтой л үр дагавар авчрах мэдээг тэр гадаад ертөнцөд түгээлээ. Гэвч утааны эсрэг, түгжрэлийн эсрэг, хүн амын төвлөрөлийн эсрэг тэр өөрөө юу хийсэн юм бэ? Эрх баригч АН-ын даргаар хоёр удаа, Монгол улсын ерөнхий сайдаар 2 удаа, УИХ-ын гишүүнээр 2 удаа, Монгол улсын ерөнхийлөгчөөр 8 жилийн хугацаанд 2 улиран сонгогдсон Ц.Элбэгдорж ерөнхийлөгчөөс асуух эрхтэй гэж бодно. Түүнд тодорхой хэлэх үг, хийсэн ажил байхгүй. Харин ганцхан мэргэн санаа бий. Тэр бол дуугүй суулгүй, асуудлыг шүүрч аваад бушуухан шүүмжлэх. Тэр түүнийгээ л, чаддаг зүйлээ л хийлээ. Ардчилал нэрийн дор хот төлөвлөлтийг үгүйсгэж, иргэдийн суурьшил, хөдөлгөөний тогтсон журмыг "хүний эрх" нэрээр л хүчингүй болгож, боловсон хүчний төлөвлөлт, суурьшлын асуудлыг эмх замбараагүй болгох ажлыг гардан хийсэн хүний нэг нь Ц.Элбэгдорж гэж л санагдах юм.
Ойрхоны жишээ татахад, утаатай, түгжрэлтэй, нийслэлийн тулгамдсан асуудлыг шийдвэрлэх зорилгоор буруу жолоотой машин болон урт настай машины импортыг хориглох тухай асуудлыг хотын дарга Э.Бат-Үүл тавихад хэн хориг тавьж, няцаалаа. Ц.Элбэгдорж ерөнхийлөгч шүү дээ. -Бат-Үүлээ, чамд буруу жолоотой машинаас өөр оролдох, хийх ажил алга уу? Буруу жолоотой машиныг импортоор оруулж ирэхийг хориглох тухай асуудлаа орхи гэдэг тушаалыг Ц.Элбэгдорж ерөнхийлөгч л өгч, Э.Бат-Үүлийн ард зогсож байсан, хотын мэргэжилтнүүдийн олон жилийн судалгаа, түүнд тулгуурласан шийдвэрийг няцааж байсан түүхийг санахад л хангалттай. Иргэд бол мартамхай, аквариумын загас биш. Өнөөдөр дахиад л, хотоос, байгаль орчны яамнаас, Зам тээврийн яамнаас буруу жолоотой машин, урт настай машины импортыг хязгаарлах тухай дахин ярьж эхэллээ. Та бас хориглох уу? Улстөрч ерөнхийлөгчид хувийн имиж чухал байж болно, ард иргэдэд асуудлыг бодитойгоор харж шийдвэрлэдэг удирдагчийн үг, халуун сэтгэл чухал чухал байна.
Элбэгдорж ерөнхийлөгч Улаанбаатарт амьдрахгүй ч, монголчууд утаатай ч гэсэн Улаанбаатартаа амьдарна.
Аналист Ц.ЭНХБАТ