.JPG)
АН-ынхан очсон салбар болгоноо нурааж, улс орны хөгжлийг уруудуулсан гэж хэлэхийг хүсэхгүй байна. Гэхдээ л яваад, үзээд, сурвал ийм зүйл алхам тутамд тохиолдох аж. Хамгийн наад захын жишээ бол төрийн мэдлийн, олон нийтийн статустай МҮОНРТ өр ширэндээ баригджээ. МҮОНРТ-ийн ерөнхий захирлаар АН-ын ерөнхий нарийн бичгийн даргаар ажиллаж байсан Ц.Оюундарийг томилсон хугацаанд энэ байгууллага санхүүгийн хувьд сөхөрчээ.
Рио-2016 олимпийг дамжуулах төлбөрт л гэхэд л 1 сая ам.доллар зарцуулсныхаа төлбөрийг одоо хүртэл төлж дуусаагүй. Дээр нь, Euro-2016 хөлбөмбөгийн тэмцээнийг дамжуулах төлбөрийн үлдэгдэл гээд нийтдээ, 2 тэрбум төгрөгийн өртэй байгааг тус байгууллагын дотоод аудит тогтоожээ.
Хувийн байгууллагууд авахаараа ашигтай ажилладаг, төрийн байгууллага авахаараа алдагдалтай ажилладаг гажиг тогтолцоог эндээс ажиглаж болох нь. Өмнө нь ТВ5 телевиз өвөл, зуны олимпийг дангаараа, ТВ9 телевиз 2012 оны Euro-2012 хөлбөмбөгийн тэмцээнийг худалдан аваад, үр ашигтай ажиллаж байсан түүхийг санахад л хангалттай. МҮОНРТ-ийг санамсартай, санамсаргүй 2 ,3 суваг болгон сарниулсан бодлогын алдаа ч Оюундарийн үед хамаарна. Гэтэл тэрбум, тэрбумаар мөнгө цацсан хэрнээ, МҮОНРТ-ийг одоо болтол тоон системд шилжүүлэх ажлаа ч орхигдуулж ирснийг уран бүтээлчид нь шүүмжилж байна.
Э.ҮҮЛЭНЦЭЦЭГ
