2016 онд бүгд л эдийн засаг, эдийн засаг гэж ярьж, анхаарцгаасан. Илүү дутуу томилолтоо цуцалж, найр наадмын чанартай үйл ажиллагаагаа хязгаарласан. Шинэ жилийн үдэшлэг, party хийдэг уламжлалаа европын олон орны компаниуд өнжсөн. Тэд хариуцлагатай байхыг ард иргэддээ үлгэрлэсэн. Эдийн засгийн нөхцөл байдал таагүй байдалд шилжсэнтэй холбогдуулан ACEM-ийн чуулга уулзалтыг зориглон хүлээн авах улс олдохгүй байхад, "Монгол хүлээн авна" гэж цээжээ дэлдсэн хүн бий.
Сэтгэлийн хөдөлгөөнөөр гаргасан тэр хүний ганцхан шийдвэр нь, монголчуудад, 2 жилийн хөдөлмөр, 600 тэрбумын үнэтэй туссан. Шийдсэн асуудал багатай, өргөн зугаалга маягтай үйл ажиллагаа болж өнгөрснийг хэн нэгнээр гэрчлүүлэх шаардлага байхгүй.
Энэ арга хэмжээ нь, зөвхөн ерөнхийлөгч, гадаад хэргийн сайд Пүрэвсүрэн нарын хувийн чанартай шахуу арга хэмжээ болсныг Тэрбишдагва гишүүнээс өгсүүлээд төрийн түшээд хурцаар шүүмжилсэн. Үлдэх зүйл багатай. Залгамж чанартай зүйл үгүйлэгдсэн гэх шүүмжлэл дагалдсан. Ёстой л үлдэх хүнээр ачаа бүү татуул гэдэг сургамжийг монголчууд биеэрээ амссан. Тэр гадаадад явах, дэлхийн томчуудтай гар барих, зэрэгцэн зогсож зургаа татуулах дуртай.
Давосын боломжийг тэр алдахыг хувьдаа хүссэнгүй. Харин, миний бодоход, ажлаа удахгүй өгөх түүний оронд Засгийн тэргүүнийг оролцуулсан бол алс ирээдүйд илүү хэрэг болох байлаа. Элбэгдоржийн алдааг сануулах мэт, энэ жилийн Дэлхийн эдийн засгийн форум нь "Хариутай бас хариуцлагатай удирдлага" сэдэв дор үргэлжилж байна.
Ц.ХИШГЭЭ