Сумд руу чиглэсэн хөгжлийн бодлого дутагдаж байна
Сүүлийн жилүүдэд Дорнод аймгаас Улаанбаатар хот руу шилжин явах хөдөлгөөн тасралтгүй өсч байсан бол өнгөрсөн 2016 онд 9,6 хувиар буурчээ. Харин хөдөө сумдаас аймгийн төврүү шилжин ирэгсэд 1,8 хувиар өссөн байна.
Сүүлийн 12 жилийн хугацаанд орон нутгаас Улаанбаатарыг зорих шилжилт хөдөлгөөн хийлгэх иргэдийн тоо 30 мянгаас буухгүй болсон. Хотыг зорьж байгаа шалтгаан нь хөдөөд ажлын байр байхгүйгээс үүдэлтэй гэж тайлбарладаг юм. Харин өнгөрсөн 2016 оны байдлаар Дорнод аймгаас Улаанбаатарыг зорих иргэдийн тоо 738-р буурчээ. Нийслэл рүү шилжин явагсдын тоо буурсан бол Чойбалсан хот руу сумдаас шилжин ирэх иргэдийн тоо жилээс жилд өссөөр байна. Өнгөрсөн онд л гэхэд 1,8 хувиар өссөн үзүүлэлттэй байна. Энэ тоо судалгаанаас сум руу чиглэсэн эдийн засгийн хөгжлийн бодлого дутагдаж байна гэсэн дүгнэлтийг хийж болохоор байгаа юм. Өөрөөр хэлбэл хөгжиж байгаа сумаас аймгийн төв рүү хийгдэх шилжилт хөдөлгөөн харьцангуй бага, харин хөгжилгүй сумдад шилжилт хөдөлгөөн өндөр байна.
ДОРНОД АЙМГААС А.ИЧИНХОРЛОО МЭДЭЭЛЛЭЭ