Ардчилсан намын даргын сонгуульд УИХ-ын гишүүн гурван (Ж.Батзандан, С.Эрдэнэ, Д.Эрдэнэбат) эрхэм, ямар нэг улс төрийн албан тушаал хашаагүй байгаа хоёр (Н.Алтанхуяг, Л.Гантөмөр) эрхэм өрсөлдөж байгаа. Үүнээс үүдэж АН-ын дарга УИХ-аас сонгогдох уу, Гудамжнаас сонгогдох уу гэсэн асуулт гарч, оролцогчид янз бүр тайлбар хийж буй.
Дээрх асуудлаар “Иргэний гүүр мэдээлэл судалгааны төв” АН-ын гишүүдийн дунд социологийн судалгаа явуулжээ. Тус судалгаанд АН-ын 1200 гишүүн хамрагдсан байна. Судалгаанд оролцсон АН-ын гишүүдийн 78.4 хувь АН-ын дарга “УИХ-ын гурван гишүүний аль нэг нь сонгогдох нь зөв” гэж үзсэн байна. Харин Н.Алтанхуяг, Л.Гантөмөр хоёрын аль нэг нь АН-ын даргаар сонгогдох хэрэгтэй гэж 12.8 хувь нь хариулсан бол 8.8 хувь нь хаанаас ч байж болно гэж хариулжээ.
Зураг : АН-ын гишүүдийн дунд хийсэн судалгааны дүн
Дээрх судалгааны дүнд үндэслэж парламентаас сөрөг хүчинг хэрхэн хийж болдог жишээг сүүлийн дөрвөн жил МАН үзүүлж чадсан. Тэр утгаараа тэд 65-уулаа УИХ-ын танхимыг бүрдүүлж буй. Тухайлбал энэ бүгдийг Ерөнхий сайд Ж.Эрдэнэбат “Бид өмнө нь 26-уулаа байхдаа хүнд таалагдахын тулд юу ч хамаагүй ярьдаг байсан” гэснээс нь мэдэж болно. Угаасаа улс төрийн шүүмжлэлийг түлхүү хүлээн авч, үүнээс төрийн ажлыг дүгнэдэг сонгогчид, 80 мянга гаруй айл орон сууцтай болсон, олон мянган км автозам тавигдсан зэрэг бодит ажлуудаас илүү сөрөг хүчний шүүмжид илүү итгэж, АН-д маш муу гэсэн дүн тавьсан.
Тухайн үед гудамжинд байсан МАН-ын ЕНБДарга асан Ж.Мөнхбатын гардаж зохион байгуулж байсан “Давхар дээл”, “Сонгуулийн санал тоолох хар машин шатаах” зэрэг төв талбайд хийсэн сөрөг хүчний акцууд хөдлөх болгондоо нийгэмд онигоонд ороод төгсдөг байсан гэж хэлж болно. Энэ бүгдээс харахад Ардчилсан намын даргаар хэнийг сонгох нь Ардчилсан намын үйл хэрэг мэт боловч Монгол Улс парламентдаа сөрөг хүчинтэй байх эсэх нь шийдэгдэх учраас олны анхааралд байхаас аргагүй.
Ж.ГАНЦЭЦЭГ