Дэлхийн томчууд дэлхийн хэмжээний асуудлыг хэлэлцэж байна. Тэд шийдэл, гарц, хамтын ажиллагааны тухай ярьж, хэлэлцэж байна. Харин манай ерөнхийлөгч, "Давосын чуулганд очдоггүй юм, уригддаг юм" гэх өнгийн зүйлийг өөрийн мэдлийн News.mn сайт, түүний сэтгүүлчээр дамжуулан Монголд илгээж байх юм. Дор нь бичсэн комментийг нь уншиж л байгаа болов уу?
Түүнийг урьсан байж болно. Тэгвэл бас татгалзах эрх түүнд байсан. Өөрийнхээ оронд, Монгол улсыг төлөөлүүлээд, Засгийн тэргүүнийг оролцуулж болох л байсан. Тэр цаг үеэ зөв дүгнэж чадсангүй. Улсын эдийн засаг тааруу байна. Ядуурал, ажилгүйдэл газар авсан. Яг л энэ асуудлыг тэнд хэлэлцэж байна. Дээр нь, ерөнхийлөгч маань Дэлхийн эдийн засгийн форумын гол зочин, Хятадын дарга Си Жин Пинтэй уулзах нүүргүй болсон.
- Дэлхий Хятад руу хошуурч байна. Хятадтай хамтарснаар эдийн засгаа хөгжүүлж, үр ашгаа хүртэж байна. Тэгэхэд хаяа дэрлэсэн Монгол улс, монголчууд яагаад энэ боломжоо ашиглахгүй байна вэ? гэж хятад улсын удирдлага надад хэллээ гэж тэр телевизийн ярилцлагад орохдоо сайрхан ярьж байсныг санаж байна. Тэгээд тэр юу хийв ээ? Далай ламыг гардан урьж, Хятадыг Монголоос, биш ээ, Хятадууд Монголыг түлхэх ажлыг хийсэн. Түүний энэ үйлдлийг зөвтгөх хэсэг байгаа ч, цагаа олоогүй гэдэг дээр олонхи нь нэгддэг. Си Жин Пин тэргүүтэй дэлхийн удирдагчид хувийн тоглолтоо зогсоож, гар гараасаа барьж явах тухай ярьж хэлэлцэж байна. Тэгвэл Монголын удирдагчдын хувийн тоглолт, ааш араншин, Монголыг дэлхийн хөгжлөөс, "win win" бодлогоос, европ, азийг холбосон "Нэг зам, Нэг бүс" хөтөлбөрийн гадна үлдэх аюулын бүсэд авчирчээ. Энэ хэний гавьяа вэ? гэж асуумаар санагдлаа. Гуравхан сая хүн амтай, газрын дороо хэмжээлшгүй баялагтай, 60 саяар тоологдох малтай Монгол улсыг яаж ингэж ядуу зүдүү амьдруулж байгаа нь, Монголыг удирдаж буй хүмүүстэй л холбоотой. Ийм л арчаагүй, амиа бодсон удирдагчид Монголд заяажээ. News.mn-д Давосын тухай сурвалжлагыг уншаад ингэж бичмээр санагдлаа.
Ц.ЭНХБАТ
