Санхүүгийн зохицуулах хороонд хөрөнгө оруулагч, үйлчлүүлэгчдээс 2016 оны эцсийн байдлаар нийт 442 өргөдөл, гомдол иржээ. Эдгээр 202 нь даатгалын, 168 нь үнэт цаасны, 41 нь хадгаламж зээлийн хоршооны, 31 нь банк бус санхүүгийн байгууллагын салбарын асуудлаар гаргасан гомдол саналууд байна.
Хорооны Хяналт шалгалт зохицуулалтын газар өргөдөл, гомдлыг хуулийн хугацаанд хянан шийдвэрлэсэн байна.
Банк бус санхүүгийн байгууллагуудтай холбоотой өргөдөл гомдлын дийлэнх нь зээл, гэрээ, зээлийн хүүгийн асуудал байсан бол Хадгаламж, зээлийн хоршоодтой холбоотой маргааны олонхи нь удирдлагын үйл ажиллагаа, сонгуулийн асуудлаар байжээ.
Даатгалын салбарт 166 сая шахам төгрөгийн хохирлыг даатгуулагч, үйлчлүүлэгчдэд төлүүлж, Үнэт цаасны салбарт 16 сая гаруй төгрөгийн хохирлыг хувьцаа эзэмшигч, харилцагчдад буцаан олгож, тэдний эрхийг хамгаалан ажилласан байна гэж Санхүүгийн Зохицуулах хорооноос мэдээллээ.
