Улаанбаатар хотын Цагдаагийн газрын дарга, туслах комиссар Ж.Эрдэнэболд, нийслэлийн Аялал жуулчлалын газрын дарга Д.Батсүх нар хамтран ажиллах санамж бичигт гарын үсэг зурлаа.
Нийслэлийн Засаг даргын 2016-2020 оны үйл ажиллагааны “Аз жаргалтай хот” хөтөлбөрийн хүрээнд хоёр талын хамтран шийдвэрлэх тулгамдсан асуудлыг цаг алдалгүй хэрэгжүүлж, гадаадын жуулчид Улаанбаатар хотод аюулгүй зорчих нөхцөлийг бүрдүүлэх, тэдний аюулгүй байдлыг хангах, гэмт хэрэг, захиргааны зөрчилд өртөхөөс урьдчилан сэргийлэх, өртсөн тохиолдолд цагдаагийн байгууллагын үйлчилгээг түргэн шуурхай үзүүлж, жуулчдад ээлтэй хот болгох зорилготой юм.
Цагдаагийн алба хаагчдын гадаад хэлний мэдлэг, харилцааны соёлыг дээшлүүлэх сургалтыг зохион байгуулж, “Оюутан цагдаа” арга хэмжээг зохион байгуулахын зэрэгцээ гадаадын иргэд, жуулчдад аливаа эрсдэлээс урьдчилан сэргийлэх зөвлөмж, яаралтай тусламж авах утас, цагдаагийн байгууллага болон үзвэр үйлчилгээний газар байршлын мэдээллийг гадаад хэл дээр бэлтгэн түгээх ажлыг хамтран зохион байгуулах.
Аялал жуулчлалын бүс, Туул голын эргээр хэв журам сахиулах морь, завьт, машинт эргүүл болон оюутан цагдааг аялал жуулчлал, амралтын улиралд тогтмол ажиллуулах.
Гадаадын иргэд, жуулчдаас ирүүлсэн гомдол, мэдээллийг хүлээн авч, хуулийн хугацаанд шуурхай шийдвэрлэх, жуулчидтай холбогдол бүхий статистик болон бусад мэдээ мэдээлэл солилцох.
Жуулчдад үйлчилгээ үзүүлдэг аж ахуйн нэгж, байгууллагын харуул хамгаалалтын албаны үүрэг хариуцлагыг дээшлүүлэх, жуулчдын аюулгүй байдлыг хангах чиглэлээр зохион байгуулж байгаа ажилд мэргэжил арга зүйн зөвлөгөө өгч, дэмжлэг үзүүлэх чиглэлээр хамтран ажиллах юм.
А.ЦЭРЭНДУЛАМ
