АНУ-д Холливуд, Энэтхэгт Болливуд гэж хөгжлөө тодорхойлсон бол Монголд Молливуд ч гэж гарч ирэхийг УИХ-ын гишүүн асан, бэстсэллэр болсон "Ногоон нүдэн лам" романы зохиогч Оюунгэрэл хүсэн хүлээж байна. Тэр төрийн түшээгийн сонгуульт ажлаа өгснөөс хойш "Ногоон нүдэн лам" романыхаа хоёрдугаар дэвтрийг туурвих ажилдаа орсны зэрэгцээ бас кино ертөнцөд хүчээ сорихоор зэхжээ. Эхний кино зохиол нь Батаарын тухай кино зохиол байхыг ч үгүйсгэхгүй байна.
Тэр нэгэнт кино урлагт хүчээ сорихоор шийдсэн тул, кино зохиол бичих, түүний арга техникт суралцах үүднээс АНУ-ын Хавайд "Кино зохиолыг хэрхэн бичих вэ?" сургалтад сууж, кино бичих Холливудын алтан дүрмээс суралцсан байна. Хавайд сурсан мэдсэнээ зөвхөн өөртөө хадгалахыг хүсэлгүй, монголчуудтайгаа хуваалцах үүднээс "Кино зохиол хэрхэн бичих вэ?" маш сонирхолтой сургалтыг зохион байгууллаа.
Энэ бол Голливудын алтан дүрмээр хэрхэн кино бичихийг Монголд, монголчуудад заасан анхны сургалт боллоо. Сургалтанд хамрагдсан 20 орчим сонирхогчид маш өндөр сэтгэгдэлтэй үлдэв. Киног хэрхэн хийдэг тухай Голливудын тогтсон онол, арга туршлагыг Холливудын кино, Монголын киноны алдаа оноонд харьцуулж, онол практикийг чадамгай хослуулан маш цэгцтэйгээр заасныг сургалтанд оролцогчид онцоллоо. Дүрийг дагах, дүрд захирагдах. Дүр амьд байх. Дүр хувирч байх ёстой гэсэн Холливудын алтан дүрмээс Оюунгэрэл хатагтай монголчуудтайгаа тийнхүү хуваалцлаа.
Монголчуудад ойрхоноор нь жишээ авбал, "Гарын таван хуруу " киноны гол дүр Шагдар. Энэ дүр сайн дүр боловч, Холливудын зарчимд нийцээгүй. Яагаад гэвэл дүр хувирах онолд тэр нийцээгүй байна. Муу дүрээр эхэлсэн, муугаараа төгссөн гэхчилэн амьдрал, практик дээр тулгуурлан хичээлээ маш цэгцтэй, ойлгомжтой заалаа. Маш хязгаарлагдмал хүрээнд хийсэн энэхүү сургалтаа үнэ төлбөргүй хийж, анхны ангиа 1-ийн "А" ангийнхан гэж Оюунгэрэл нэрлэлээ.
Тэгэхээр энэ сургалт цаашид үргэлжлэх магадлалтай. Сургалтад оролцогчид буюу киноны 1-ийн "А" ангийнхан нэгэн группд нэгдэж, бичсэн кино зохиолоо хамтдаа хэлэлцэж байхаар тогтлоо. Оюунгэрэлийн мөрөөдөл биелэж, Молливуд дэлхийд гарч ирэх тэр цагийг наашлуулахад, сайн кино зохиол хэрэгтэй. Ямар ч гэсэн Холливудын зарчмаар хэрхэн кино бичихийг нэг биш, нэг хэсэг монгол мэддэг болсон нь амжилт.
Ц.ХИШГЭЭ