50 гаруй жилийн түүхтэй Монголын Сагсан Бөмбөгийн Холбоо 2016 оны хоёрдугаар сарын 6-нд бүх гишүүдийн их хурлаа хийсэн. Монголын сагсан ахмад болон дунд үеийн эрэгтэй, эмэгтэй тамирчдаас 35 хүн, мөн одоо ид тоглож байгаа дээд лигийн тамирчид, дасгалжуулагчид, багийн эздээс 57 хүн, эмэгтэй тамирчдаас 23 хүн, сонирхогчдын лигийн төлөөлөл 51 хүн, шүүгчид 15 хүн, дунд сургуулийн багш, дасгалжуулагчид 10 хүн ирснээс гадна хөдөө орон нутгаас Сүхбаатар, Баян-Өлгий, Архангай, Дундговь, Баянхонгор, Багахангай, Налайх, Увс аймгуудаас 23 хүн хүрэлцэн ирж, нийт 220 гаран сагсан бөмбөгчдийн бүрэлдэхүүнтэй өргөн хүрээтэй хурал болсон. Мөн хурлыг ажиглаж, дүгнэлт хийхээр Монгол улсын Эрүүл, мэнд спортын яам, Монголын Оюутны Спорт Холбоо, хуулийн багийнхан болон Олон Улсын Сагсан Бөмбөгийн Холбоо буюу FIBA-н албан ёсны төлөөлөгч энэхүү хуралд оролцож, хяналт тавьсан түүхтэй. Монголын Сагсан Бөмбөгийн Холбооны ерөнхийлөгчөөр Монгол улсын гавьяат дасгалжуулагч Ц.Цэвэрбал хуралд оролцогчдын олонхийн саналаар сонгогдсон юм.
Монголын сагсан бөмбөгийн холбооны ерөнхийлөгч Ц.Цэвэрбал, ерөнхий нарийн бичгийн дарга Ц.Дамба нар байгааг 2016 оны дөрөвдүгээр сард Улсын бүртгэл статистикийн газар тодорхойлсон.
Улсын бүртгэлийн газрын бүртгэлд Дээд лиг хийх гэж байгаа Оргил, Тамир, Идэр-Ууган нэр огтоос алга. Тэгэхээр улсын бүртгэлд бүртгэлгүй хууль бус холбоо, өөрсдийгөө МСБХ гэж нэрлэсэн хэсэг бүлэг хүмүүс сагсан бөмбөг сонирхогчдыг төөрөгдүүлэн Дээд лиг хийх гэж байна.
Мөн өнгөрсөн оны дөрөвдүгээр сард Монголын Үндэсний Олимпийн Хорооны Ерөнхийлөгч Д.Загдсүрэн Олон улсын сагсан бөмбөгийн холбоо(FIBA) руу МСБХ их хурлаа хийж, ерөнхийлөгчөөр Ц.Цэвэрбал, ерөнхий нарийн бичгийн даргаар Ц.Дамба нарыг сонгосныг батлан албан бичиг илгээсэн юм. FIBA-гийн албан ёсны бүртгэлд Монголын сагсан бөмбөгийн холбооны ерөнхийлөгч Ц.Цэвэрбал, ерөнхий нарийн бичгийн дарга Ц.Дамба нар байгаа.
Өөрсдийгөө албан ёсны холбоо гэж өргөмжлөн сагсан бөмбөг сонирхогчдыг төөрөгдүүлж байгаа хэсэг бүлэг нөхөд Дээд лиг эхлүүлж байгаа нь харамсалтай. Албан ёсны ерөнхийлөгч Ц.Цэвэрбалтай холбоо зааландаа ч орж чадахгүй байхад хуурамч холбоог хууль бусаар гаргаж ирсэн нөхөд Спортын төв ордонд “даам” гарч байна. Энэ шударга зүйл мөн үү. Хууль бус нөхдүүд хууль бус лиг хийх бус уу. Дээд лиг замын дунд зогсвол багийн эзэд тамирчдад үүсэх хариуцлагыг хэн үүрэх вэ. Хууль бус холбооны нөхдүүд Тамир, Оргил, Идэр-Ууган нар хариуцлага үүрч чадах уу.