.JPG)
УИХ-аар "даварсан" нэгэн этгээдийг дарж авлаа. Тэр даварсан этгээд болох Эрдэнэбилэг нь Худалдаа Хөгжлийн банкны 99, Улаанбаатар банкны 91 хувийг дангаараа эзэмшигч гэдэг нь шалгалтын явцад тогтоогдлоо. Тэр хамгийн түрүүнд давхар банк эзэмшихгүй гэдэг банкны хуулиа зөрчсөн нь илэрлээ. Түүнийг, мөн тэднийг хууль зөрчсөн биш, гэмт хэрэг үйлдсэн гэж УИХ-ын Хууль зүйн байнгын хорооны дарга тодотголоо. Раднаасэд энэ үйлдлийг гэм зэмгүй орхихгүй, холбогдох бүх хүмүүсийг шалгуулах хүсэлтээ илэрхийлнэ гэж чуулганы нэгдсэн хуралдааны үеэр хэлсэн үгэндээ онцоллоо.
Энэ үгний зүү нь хамгийн түрүүнд хэн хэнийг хатгаж болох бол?
Маш тодорхой хариулт бол нэг ч ердийн иргэн, тэр дундаа дунд тушаалын албан тушаалтан ч үүнд хамаарахгүй. Зөвхөн өндөр албан тушаалтан, эрх мэдэлтнүүд. Хамгийн түрүүнд, гэмт хэргийн шинж чанартай үйлдэл алга гэсэн тодорхойлолтыг бичиж, гэмт хэрэгтнүүдийг "хаацайлсан" байж болох Нийслэлийн прокурор ороогдох нь тодорхой боллоо. Түүнийг энэхүү гэмт хэрэгт хуйвалдагчаар оролцсон эсэхийг тогтооно.
Дараачийн хүмүүсийн нэрсийг жагсаавал : Тухайн үеийн Аж үйлдвэрийн сайд, одоогийн УИХ-ын гишүүн Д.Эрдэнэбат, Ц.Элбэгдоржийн шадар хүний нэг, Гадаад хэргийн сайд асан Л.Пүрэвсүрэн, Төрийн өмчийн хороог татан буулгаж, Засгийн газарт эрх мэдлийг шилжүүлсэн тухайн Засгийн газрын сангийн сайд, энэ засгийн газрын ерөнхий сайд Ж.Эрдэнэбат гээд өндөр албан тушаалтнууд орооцолдох магадлал өндөр болжээ.
Түүний ард бас нэгэн "Э" байхыг ч шударга гэж түмнээ цоллуулсан зарим нэгэн гишүүн ил далд хэлсээр ирсэн. Ийнхүү улс төр, эдийн засгийн бүлэглэлийн маш томоохон мөргөлдөөний суурийг Эрдэнэт үйлдвэрийн хувьчлал өдөөлөө. Энэ мөргөлдөөн олон асуудлыг мухарлах, тэр дундаа Монголын улс төр дэх хүчний хуваарилалтад нөлөөлөх хэмээнд хүрнэ гэж улс төр судлаачид дүгнэлээ. Энэ зодоон бол эрх мэдлийн хуваарилалтын төлөөх ил гарч буй тэмцлийн бодит илрэл гэж учир мэдэх хүмүүс хэлж байна.
Удахгүй Ц.Элбэгдоржийг ерөнхийлөгчийн сэнтийнээс буунгуут, хүчний хуваарилалт бүрэн нэг талдаа шийдэгдэнэ гэж тоймчид таамаглан тайлбарлаж байна. Монголын улс төрд том зодоон өрнөлөө. Тиймээс албан тушаал, эрх мэдэл, хүчний ноёрхлоо алдахгүйн тулд сөрөг талаас нь ямар арга хэмжээ авахыг харах үлдлээ.
Аналист Ц.ЭНХБАТ
