Өнөөдрөөс эхлээд хөдөлмөрийн чадвараа алдсан тахир дутуу, тэжээгчээ алдсаны болон үйлдвэрийн ослоос шалтгаалсан тэтгэвэр авагчид тэтгэврээ урьдчилан авах боломжтой боллоо. Ингэхдээ гурав хүртэлх сарын тэтгэврийн 50 хүртэлх хувьтай тэнцэх хэмжээний урьдчилгаа авах боломжтой юм.
Хөдөлмөр, нийгмийн хамгааллын яамнаас тэжээгчээ алдсаны тэтгэвэр авагч болон хөдөлмөрийн чадвараа алдсан, тахир дутуугийн тэтгэвэр авагч улсын хэмжээнд 100 гаруй мянган иргэн байдаг бол Дорнод аймагт 3682 иргэн дээрх 3 төрлийн тэтгэвэр авч байна.
Эдгээр иргэд тэтгэврээ хүүгүй шимтгэлгүйгээр урьдчилан авах боломж бүрдэж байгаа юм. Тэтгэврээ урьдчилан авах иргэд нь тэтгэвэр барьцаалсан зээлгүй байх шаардлагатай бөгөөд тэтгэврийн урьдчилгаа авах хүсэлтээ харьяа Эрүүл мэнд, нийгмийн даатгалын хэлтэст хандан гаргаж шийдвэрлүүлэх боломжтой.
Тусламж, дэмжлэг зайлшгүй шаардлагатай байгаа, эцэг эх нь нас барсан хүүхдүүд, тэжээгчээ алдсан иргэд, хөдөлмөрийн чадвараа алдаж, ажил хөдөлмөр эрхлэх боломжгүй болсон тэтгэвэр авагчдын амьдралд энэ шийдвэр тус дэм болно гэдгийг хэлж байна. Тэтгэврээ нийгмийн даатгалын сангаас хүү, шимтгэлгүйгээр урьдчилан авах ажил бол зөвхөн эхлэл бөгөөд цаашид хамрах хүрээг нь тэлэх асуудлыг судалж байгаа гэдгийг салбарын сайд нь онцолж байна.
А.ИЧИНХОРЛОО
