Манай улсын нийт нутаг дэвсгэрийн 80 хувьд нь цасан бүрхүүл тогтож 17 аймгийн 150 гаруй суманд өвөлжилт хүнд байна. Олон улсын байгууллагаас манай улсад тодорхой хэмжээний тусламж үзүүлж байгаа юм. Манай орны 100 суманд цагаан зудтай байна. Цасны зузаан тал хээр газраа 25-45 см байгаа бол уулархаг газраа 55-90 см хүрч нягтарч хатуурсан цастай байна.
12-р сарын дундуур өвөлжилт 13 аймгийн 110 суманд хүндэрсэн байсан бол энэ сарын эхээр 17 аймгийн 153 суманд өвөлжилт хүндэрсэн байна. Манай улсын нийт нутаг дэвсгэрийн 60 орчим хувьд хаваржилт хүндрэх эрсдэлтэй байна. Цас, зудтай байгаа аймаг, сумдын зарим нутгаар мал хорогдох, турж эцэх, хээл хаях, жилбэ муутай төллөх зэргээр мал хаваржилт хүндэрч эхлээд байна.
Цас ихтэй нутгуудаар цас нэмж орох, үе үе хүчтэй цасан болон шороон шуурга шуурах төлөвтэй байгаа тул мал төллөлт, малын хариулга маллагаанд тааламжгүй байхыг анхаарч, цаг агаарын дунд болон богино хугацааны мэдээг тухай бүр авч ашиглаж байхыг Ус цаг уур, орчны судалгаа мэдээллийн хүрээлэнгээс зөвлөж байна. Монгол улс энэ хавар 20 сая төл хүлээж авна.
А.ЦЭРЭНДУЛАМ