.jpg)
МҮОХ-ны Их Хурлын тов гарсан. Их хуралд бэлдэх ажлын хэсэг томилогдсон. МҮОХ-ны ерөнхийлөгчид нэр дэвших журмыг баталсан. Заалнаас нэр дэвшихийг хориглосон тул өмнө нь нэр дэвшигчдийг материалыг дугтуйгаар хүлээн авах болсон. Зөвхөн саналаа ирүүлсэн хүмүүс л нэр дэвших эрхтэй. Энэ бол энэ удаагийн Их Хурлын онцлог.
МҮОХ-оог спортынхноос гадна улс төрчид, бизнесийнхэн ямагт сонирхож ирсэн. Нэр дэвшигчдийн хүсэлтийг энэ сарын 8-ны өдөр хааж, 9-ны өдөр дугтуйг задалж, нэр дэвших хүсэлтэй хүмүүсийг зарлана гэж байсан ч үйл явц удааширч эхэллээ. Дугтуй задарсангүй, нэрийг зарласангүй. Нэр дэвшигчдийг нууцлах шаардлага үүссэн бололтой. Гэвч Монголд нууц гэж зүйл байхгүй болсон.
Энэ удаад МҮОХ-ны одоогийн ерөнхийлөгч Загдсүрэн, УИХ-ын гишүүн асан Сайхансамбуу, Монголын даамны холбооны ерөнхийлөгч Бат-Эрдэнэ, Монголын волейболын холбооны ерөнхийлөгч Ц.Бат-Энх, Монголын гимнастикийн холбооны ерөнхийлөгч Ц.Халтар, Монголын Буудлагын холбооны ерөнхийлөгч Э.Мөнх-Очир, Монголын Шагайн холбооны ерөнхийлөгч Я.Батсуурь нарын 6-7 хүн нэр дэвшинэ гэсэн мэдээлэл ил болж эхэллээ, хэдийгээр албан ёсоор зарлаагүй ч гэсэн. Турк улсад дипломат албанд зүтгэж буй Э.Мөнх-Очир хэрвээ МҮОХ-ны ерөнхийлөгчөөр сонгогдвол эрхэлж буй ажлаа өгөхөд бэлэн гэдгээ ч мэдэгдсэн байна. Ямар ч гэсэн энэ удаагийн сонгууль ихээхэн өрсөлдөөнтэй болох төлөвтэй гэж спортын хүрээнийхэн хүлээж байна. МҮОХ-ны их хурал төлөөлөгчдөө аль хэдийнээ сонгосон. Их хурал энэ сарын 24-нд болно.
Э.ЛХАГВА
