/Зүүн гар талаас : "Хишиг Арвин Индустриал" ХХК-ийн гүйцэтгэх захирал Х.Батхишиг, Эрдэнэс-Таван Толгой ХК-ийн гүйцэтгэх захирал Д.Ариунболд/
Цанхийн баруун уурхайн тендерт монгол компаниуд шалгарч, улсынхаа хөгжилд томоохон хувь нэмэр оруулах гэж байгаад бидний зүгээс талархаж байна. Тендерийг хуулийн дагуу, ил тодоор, маш шударга шалгарууллаа.
Хоёр жилийн турш зогссон Баруун Цанхийн уурхайн үйл ажиллагаа өрнөж эхэллээ. Цанхийн баруун уурхайн уулын ажлын үйлчилгээ гүйцэтгэх тендерт "Монгол уурхайчид" түншлэл ялалт байгуулсан нь Эрдэнэс-Таван Толгой ХК шиг компанийн олборлолт болон бусад үйл ажиллагааг үндэсний компаниуд хийж чадах боломжтой болсон дохио гэж дүгнэж байна. Улсынхаа хөгжлийн төлөө гэсэн том зорилгын төлөө нэгэн баг болон ажиллах болсон та бүхэндээ ажлын өндөр амжилт хүсье гэж түншлэлийн гэрээнд гарын үсэг зурах үедээ Эрдэнэс-Таван Толгой ХК-ийн гүйцэтгэх захирал Д.Ариунболд онцолж хэллээ.
/Зүүн гар талаас : "Олборлолт" ХХК-ийн гүйцэтгэх захирал Б.Батсүх, Эрдэнэс-Таван Толгой ХК-ийн гүйцэтгэх захирал Д.Ариунболд/
Цанхийн баруун уурхайн тендерт гадаад, дотоодын олон компани оролцсоноос "Хишиг Арвин Индустриал" ХХК, "Олборлолт" ХХК , "Мера" ХХК нар шалгарсан байна. Тэд нийлж нэгдэн "Монгол уурхайчид" түншлэл байгуулж, Эрдэнэс-Таван Толгой ХК-тай хамтран ажиллах гэрээг саяхан үзэглэсэн байна.
Цанхийн баруун уурхайд уулын ажлын үйлчилгээ гүйцэтгэх гэрээт олборлогч "Хишиг Арвин Индустриал” ХХК-ийн гүйцэтгэх захирал Х.Батхишиг, “Олборлолт” ХХК-ийн гүйцэтгэх захирал Б.Батсүх нар Эрдэнэс Таван Толгой ХК-ийн гүйцэтгэх захирал Д.Ариунболдтой гэрээнд гарын үсэг зурснаар Цанхийн баруун уурхайн олборлолтыг Монгол уурхайчид өөрсдөө олборлох боллоо.
Ц.ХИШГЭЭ