.JPG)
Монгол Улсын насанд хүрэгчдийн шатрын эрэгтэйчүүдийн 57, эмэгтэй 49 дэх удаагийн насанд хүрэгчдийн улсын аварга шалгаруулах тэмцээн 3 дугаар сарын 17-26-ны хооронд Хэнтий аймгийн Дадал суманд үргэлжилж нийт дүнгээ гаргалаа.
Энэ удаагийн тэмцээнд урьдчилсан хагас шигшээ шатнаас шалгарсан эрэгтэй 12, эмэгтэй 12 шатарчин өрсөлдсөн юм. Эрэгтэйчүүдийн ангиллын шагналт байранд 1-р байранд “Алдар” спорт хороо, Баянхонгор аймаг, “Зууны шатар” клубийн тамирчин Их мастер Ц.Батчулуун 9 оноотой 2-р байранд Хэнтий аймаг, ТЕГ-ын “Эрч” спорт хорооны тамирчин Дэлхийн шатрын холбооны мастер У.Насанжаргал 8 оноотой 3-р байранд “Сүлд” спорт хороо, Ховд аймгийн тамирчин Олон улсын мастер С.Билгүүн шалгарсан байна.
Тэмцээний эмэгтэй ангилалд 1-р байранд “Хан-Алтай” клуб, МУИС, Увс аймгийн тамирчин Олон улсын мастер Ү.Үүрийнтуяа 9 оноотой 2-р “Мончесс” клуб, Хэнтий аймгийн тамирчин, МУГТ, Их мастер Т.Батчимэг 8.5 оноотой 3-р байранд “Алдар” спорт хорооны тамирчин Олон улсын мастер Э.Янжиндулам 7 оноотой шалгарчээ.
Энэхүү тэмцээний эрэгтэйчүүдийн ангилалд түрүүлсэн Их мастер Ц.Батчулуун насанд хүрэгчдийн УАШТ-нд дөрөв дэх удаагаа түрүүлж буй нь энэ юм. Харин эмэгтэйчүүдийн ангилалд түрүүлсэн Ү.Үүрийнтуяа нь УАШТ-нд дөрөв дэх удаагаа оролцож байгаа бөгөөд анх удаагаа түрүүлж байна. Энэ удаагийн Улсын аварга шалгаруулах тэмцээнд Их мастер Б.Гүндаваа, А.Энхтуул нарын тэргүүтэй шилдэг тамирчид оролцсонгүй.
Эх сурвалж : Sportlife.mn
