Монгол Улсад Их Британи Умард Ирландын Нэгдсэн Вант Улсын Гадаад худалдааны сайд Марк Гарние айлчилж байна. Айлчлалынхаа хүрээнд Марк Гарние өнөөдөр Монголын хөрөнгийн биржид зочилж, Үнэт цаасны хоёрдогч зах зээлийн 5442 дахь арилжааг нээж, цан цохилоо. Энэ үеэр тэрээр Британи улс өөрсдийн дадлага туршлагаа Монголын Засгийн газар болон Монголын компаниудтай хуваалцаж, санхүү хөрөнгө оруулалт татан өсөн дэвжих гарцыг бий болгохыг хүсэж байна гэдгээ илэрхийлсэн байна.
Түүнчлэн Лондонгийн хөрөнгийн бирж болон Монголын хөрөнгийн бирж хооронд Миллениум Ай Ти арилжааны системийн ажлын хүрээнд хамтын ажиллагаа аль хэдийнэ эхэлсэн гэдгийг дурдаад “Монголын олон компаниуд Петроматад компанийн жишгээр Лондонгийн хөрөнгийн биржид бүртгэлтэй болно гэж найдаж байна” гэжээ.
Монголын компаниуд Лондонгийн хөрөнгийн бирж дээр бүртгэлтэй болсноор маш их ашиг олох боломж бүрдэх юм. Лондонгийн хөрөнгийн бирж дээр хувьцаагаа гаргаснаар ямар хөрөнгө оруулагчийг татах вэ гэдэг нь тодорхой болдог байна. Одоогийн байдлаар Монголын компаниудыг Лондонгийн хөрөнгийн зах зээл дээр гаргах хэлэлцээр явж байгаа бөгөөд удахгүй шийдэгдэх юм байна.
Э.ҮҮЛЭНЦЭЦЭГ