.jpg)
БНХАУ-ын Чалко компанид төлөх өрийг бүрэн барагдуулсан ч хоёр улсын засгийн газар хооронд байгуулсан гэрээ хүчин төгөлдөр үйлчилж байна. Цанхийн Зүүн уурхайн олборлосон нүүрсний 80 хувийг дангаар нь Чалко-д нийлүүлэх үүргийг Монголын Засгийн газар тус гэрээгээр хүлээсэн. Өр дарсантай холбогдуулан үнэ өсгөх, зах зээлийн ханшид ойртуулах гэдэг нь хоёр улсын засгийн газраас томилогдсон ажлын хэсгийн шийдэх асуудал юм. Монголын талаас нүүрсний үнийг зах зээлийн ханшид ойртуулах санал тавьж эхэлсэн мэдээлэл түгсэн. Түүнтэй холбоотойгоор Цанхийн Зүүн уурхайн олборлолт, тээвэрлэлт түр зогссон гэх тайлбарыг албан бус эх сурвалж тайлбарлаж байна. Цанхийн Зүүн уурхайн нүүрсний үнийг аль болох зах зээлийн ханшид ойртуулж, орлого, үр ашгаа нэмэгдүүлэх нь Монголчуудын ойрын зорилго байх ёстой гэдэг байр суурийг эдийн засагчид хуваалцаж байна. Нүүрсний үнийг зах зээлийн ханшид ойртуулах нь зөв гэдэг байр суурийг иргэд ч дэмжиж байна.
Ц.ХИШГЭЭ
