"Оюуны Ундраа" цогцолбор сургууль үүсэн байгуулагдсаны 20 жилийн ой энэ онд тохиож байна. Энэ хүрээнд энэ сургуулийн 3333 сурагч өнөөдөр төв талбайд Монгол Улсын хөдөлмөрийн баатар, ардын уран зохиолч, “Болор цом”-ын ууган эзэн, яруу найрагч Д.Пүрэвдорж агсны “Тусгаар тогтнол" шүлгийг нэгэн зэрэг уншлаа.
Өнөөдрийн үйл ажиллагаанд тус сургуулийн 3500 хүүхдээс 3333 нь оролцлоо. Учир нь Монголын төрт ёсны уламжлалыг цаашид мянган жил бадрахыг бэлгэдэж байгаа юм байна. Энэ сургуулийн 95 бүлгийн 1-12 дугаар ангийн сурагчид энэ үйл ажиллагааг бий болгохын тулд гурван сарыг зарцуулсан байна. Нэгдүгээр ангийн бяцхан жаалуудаас эхлээд ахлах ангийн ах эгч нар нийлсэн 3333 сурагч энэ арга хэмжээнд оролцож байна.
Энэхүү арга хэмжээгээр дамжуулан хүүхэд багачуудад эх оронч сэтгэлгээ суулгаж, тусгаар тогтнол түүний үнэ цэнийг мэдрүүлэх, эх орон, эцэг эхээ хайрлах ухааныг сурталчлан таниулахыг зорьсон болохыг зохион байгуулагчид хэлж байлаа. Тэд Монгол Улсын газрын зураг хэлбэртэй болон жагсаж, үндэсний хувцсаараа гоёжээ.
Үндэстэн, ястан бүрийн дээл хувцас, өмсгөл зүүслээр гоёсон хүүхдүүд тусгаар тогтнол гэж ямар үнэ цэнтэй зүйл байдаг вэ гэдгийг өөр өөрийн бяцхан зүрхнээс мэдэрч, бусдад дуу хоолойгоо хүргэж байна.
А.ЦЭРЭНДУЛАМ
