Монгол Улсын Шадар сайдын Хөвсгөл аймгийн Засаг даргатай байгуулсан гэрээний дагуу Гамшгаас хамгаалах иж бүрэн сургуулийг тус аймагт 2017 оны 04 дүгээр сарын 10-12-ны өдрүүдэд зохион байгуулах юм.
Сургуулийн бэлтгэл, бэлэн байдлыг хангуулж мэргэжил, арга зүйн зөвлөгөө өгөх, удирдлага, зохион байгуулалтаар хангахаар Онцгой байдлын ерөнхий газрын Гамшгаас урьдчилан сэргийлэх газрын дарга, хурандаа Б.Ууганбаяраар ахлуулсан ажлын хэсгийн бүрэлдэхүүн Хөвсгөл аймагт ажиллаж байна.
Ажлын хэсэг өнөөдөр аймгийн Онцгой комиссын гишүүд, Онцгой байдлын газрын албан хаагчид, орон нутгийн гамшгаас хамгаалах албад, мэргэжлийн ангиудын бие бүрэлдэхүүн, төрийн болон төрийн бус байгууллага, аж ахуйн нэгжийн удирдлагуудтай уулзаж, сургуулийн бэлтгэл, бэлэн байдлыг хангах чиглэлээр үүрэг өгөв.
Энэ үеэр аймгийн орлогч дарга А.Эрдэнэбаатар Гамшгаас хамгаалах иж бүрэн сургуулийн бэлтгэл ажлын хүрээнд аймгийн хэмжээнд хийж гүйцэтгэсэн ажил, бэлтгэл ажлын явцыг сургуулийн удирдагч Гамшгаас урьдчилан сэргийлэх газрын дарга, хурандаа Б.Ууганбаяр болон ажлын хэсгийнхэнд танилцуулсан.
Бүх шатны Засаг дарга, аймгийн Онцгой комисс, орон нутгийн гамшгаас хамгаалах алба, мэргэжлийн ангийн удирдах бүрэлдэхүүний гамшгийн менежментийн мэдлэгийг дээшлүүлэх, орон нутгийн гамшигтай тэмцэх чадавхийг сайжруулах, харилцан ажиллагааг жигдрүүлэх, хүч хэрэгслийн бэлэн байдлыг дээшлүүлэх зорилготой Гамшгаас хамгаалах иж бүрэн сургуулийн үеэр орон нутгийн гамшгаас хамгаалах алба, мэргэжлийн ангиудын хүрээнд тус аймагт тохиолдож байсан болон тохиолдож болзошгүй аюулт үзэгдэл, ослоор цагийн байдал үүсгэн ажиллуулж, гамшгаас хамгаалах дадлага сургуулиудыг бодит байдалд тулгуурлан зохион байгуулна.
Гамшгаас хамгаалах иж бүрэн сургуулийг зохион байгуулахтай холбогдуулан аймгийн Засаг даргын захирамжаар аймгийн хэмжээнд өндөржүүлсэн бэлэн байдалд шилжүүллээ. Гамшгаас хамгаалах иж бүрэн сургуулийн бэлтгэл, бэлэн байдлыг хангах дадлага сургуулиуд Хөвсгөл аймагт өнөөдрөөс ийнхүү эхэлж байна гэж Онцгой байдлын ерөнхий газраас мэдээллээ.
