Олны хайр, хүндэтгэлийг даасан хүн бол Бат-Эрдэнэ аварга. Тэр хайр хүндэтгэлээ дагаж УИХ-д 3 дараалан сонгогдсон. Нэг удаа ерөнхийлөгчид нэр дэвшсэн. Нам нь буюу, С.Баяр өрсөлдөгч намынхаа нэр дэвшигч Ц.Элбэгдоржтой хуйвалдаж түүнийг унагасан гэж түүхэнд бичигддэг. Гэхдээ тэр ард түмнийхээ хайр хүндэтгэлийг хүлээж УИХ-д ээлжит удаагаа сонгогдсон. Нам нь алдаагаа засаж сайдын сэнтийд аваргыг залсан. Энэ бол та ерөнхийлөгчид дахин нэр дэвших тухай бүү яриарай гэдэг дохио, түүний урьдчилгаа байсныг аварга ойлгосон эсэхийг одоо таашгүй. Тэр ямар ч гэсэн дэвшинэ гэж хэлэхгүй ч, дэвшээч гэхийг хүлээж сууна. Гэтэл гай таарав.
Түүний удирдсан Батлан Хамгаалах Яамны харьяа цэргийн ангид дэлбэрэлт болж цэргийн алба хааж байсан монголын сайхан хөвгүүд амь нас, эрүүл мэндээрээ хохирсон цочирдом үйл явдал өрнөлөө. Хууль хүчнийхэн, ЭМЯ, эмч сувилагч нар шуурхай ажиллаж байна. Хэргийн явцыг тогтоох тухай мэдээлж байна. Гэхдээ эр цэргийн албанд эрүүл саруул мордоод, хариуцлагагүй, хяналтгүй үйлдлээс амь нас, эрүүл мэндээрээ хохирсон аав, ээжийн хайртай хөвгүүдийн өмнөөс салбар хариуцсан сайд хариуцлага хүлээх ёстой. Энд ямар нэгэн тайлбар сонсох хэрэггүй. Бат-Эрдэнэ аварга ямбыг нь эдэлж байсны хувьд ялыг нь ч бас үүрэх учиртай. Телевизийн нэвтрүүлэгт орж, иргэдийг уяртал ярьсан шигээ ёс жудагтай эр хүн гэдгээ үзүүлэх хэрэгтэй. Тэр эхний удаа сайдын ажлаа өгөх учиртай.
Э.ҮҮЛЭНЦЭЦЭГ