Энэтхэгийн Дели хотод ирэх 5-р сарын 10-14-ны өдрүүдэд зохиогдох насанд хүрэгчдийн Азийн АШ Чөлөөт бөхийн тэмцээнд оролцох Монголын шигшээ багийн эрхийг хассан шийдвэрийг ОУЧБХ-ноос ирүүлжээ.
Шалтгаан нь маш энгийн тэмцээн эхлэхээс 2 сарын өмнө баг, тамирчдынхаа бүрэн мэдүүлгийг л өгөх ёстой байдаг журмыг Монголын ЧБХ хангаж чадаагүй байна. Өөрөөр хэлбэл тэд мэдүүлгээ хоцроожээ. Хэрвээ ААШТ-д оролцоогүй тохиолдолд Дэлхийн АШТ-ээс автоматаар хасагддаг журам үйлчилдэг ажээ.
Монголын Чөлөөт Бөхийн Холбооныхон бүхий л арга замаар тамирчдаа ААШТ-нд оролцуулахаар хөөцөлдөж буй юм байна. ОУЧБХ шийдвэрээ эргэж харж, өөрчилнө гэдэгт нь их эргэлзээтэй гэж эх сурвалж мэдээлж байна. Хэрвээ Азийн АШТ-ийг өнжвөл, Дэлхийн аваргыг ч бас өнжих болох нь. Тамирчдын урсгасан хөлс, багш дасгалжуулагчдын хийсэн судалгаа, тактик бүгд хий хоосон урсахад ойртсон байна. Энэ бол тус холбооны үйл ажиллагаа хэрхэн доголдож буйн нэг илрэл болжээ. Өмнө нь тамирчдынхаа визийг авч чадаагүйгээс болж, бөхчүүдээ орхиж, дасгалжуулагч багш нар нь өөрсдөө барилдаж байснаасаа ч сургамж аваагүй байна.
Ц.ХИШГЭЭ
