3 сая Монголчуудын хувьцаа эзэмшдэг Эрдэнэс Таван-Толгой хувьцаат компанийн Хувьцаа эзэмшигчдийн ээлжит хурал өнөөдөр боллоо. Хувьцаа эзэмшигчдийн ээлжит хурлаар Эрдэнэс Таван-Толгой ХК-ийн 2016 оны үйл ажиллагааны тайланг хэлэлцэж, сайшаалаа. Эрдэнэс Таван-Толгой ХК-ийн засаглалыг сайжруулж, улам боловсронгуй болгох, ТУЗ-ийн хараат бус гишүүдийг сонгохдоо иргэдийн төлөөллөөс нэр дэвшүүлж сонгодог болох, 1072 хувьцааг яаравчлан амилуулах зэрэг асуудлаар зарим гишүүд санал бодлоо илэрхийллээ.
Эрдэнэс Таван-Толгой ХК бол 100% монгол ажилтнаас бүрдсэн төрийн өмчит, монголын компани. Нийт 600 гаруй монгол ажилтан, ажилчид ажилладаг. Олборлолт, тээвэрлэлт, менежмент зэрэг бүхий л түвшний ажлыг монгол мэргэжилтнүүд гүйцэтгэдэгээрээ онцлогтой. Монголын төр 85,19%, иргэд 14, 75, үлдсэн хувийг нь аж ахуйн нэгжийн төлөөлөл эзэмшдэг тус компани өнгөрсөн оны 9-р сараас эхлэн үр ашигтай ажиллах болсон. БНХАУ-ын Чалко компанид төлөх 7 жил дамнасан өрийг Эрдэнэс Таван-Толгой ХК энэ оны эхний улиралд багтаан тэглэсэн. Энэ бол Эрдэнэс Таван- Толгой ХК-ийн Д.Ариунболд захиралтай менежментийн баг, хамт олны хичээл зүтгэл болохыг хувьцаа эзэмшигчид онцоллоо.
Эрдэнэс Таван-Толгой ХК-ийн асуудлаар байнга байр сууриа илэрхийлдэг, Эрдэнэс Таван-Толгой ХК-ийн " гол шүүмжлэгч" Л.Наранбаатар ч Эрдэнэс Таван-Толгой ХК-ийн өнөөгийн баг, хамт олонд талархалтай байгаагаа илэрхийллээ.
Ц.ХИШГЭЭ