Монгол Улсын тамхины хяналтын эрх зүйн орчныг сайжруулах нь төслийн хүрээнд эрүүл мэндийн чиглэлээр ажилладаг сэтгүүлчдийн дунд ''Тамхины хяналтын эрх зүйн орчныг сайжруулахад хэвлэл мэдээллийн оролцоо, хувь нэмэр'' сэдэвт олон улсын сургалт-хэлэлцүүлгийг УИХ-ын эрхэм гишүүн Б.Баттөмөрийн санаачлагаар Тамхигүй хүүхдүүд олон улсын байгууллагын дэмжлэгтэй зохион байгууллаа.
Сургалтын чиглүүлэгч багшаар ОХУ-ЫН ТӨРИЙН ДУМЫН ЭРҮҮЛ МЭНДИЙН БАЙНГЫН ХОРООНЫ ДЭРГЭДЭХ ШИНЖЭЭЧДИЙН ЗӨВЛӨЛ, ЭМЯ-НЫ ТАМХИТАЙ ТЭМЦЭХ АСУУДЛЫГ ЗОХИЦУУЛАХ ЗӨВЛӨЛИЙН ГИШҮҮН АЛЕКСЕЙ ШАБАШОВ тэргүүтэй экспертын баг ажиллаж байгаагаараа онцлог давуу талтай бөгөөд оролцогчид манай хойд хөршид тамхины хэрэглээг нийт хүн амын дунд бууруулах, ард иргэдийнхээ эрүүл мэндийг хамгаалахад хууль эрхзүйн орчныг ДЭМБ-ын Тамхины хяналтын суурь конвеництай нийцүүлэн туршлага, хэвлэл мэдээллийн үүрэг, оролцоо зэрэг асуудлаар мэдээлэл авлаа.
Түүнчлэн тамхитай холбоотой асуудлыг хөндөх, тамхигүй орчныг бүрдүүлсэн, дам тамхидалтаас ард иргэдийнхээ эрүүл мэндийг хамгаалсан хууль эрх зүйн дэмжлэгт орчны ач холбогдлыг сурталчлах чиглэлээр тэтгэлэгт уралдааныг хэвлэл мэдээллийнхэний дунд зарлаж байна. Энэхүү уралдааны зорилго нь одоогийн хүчин төгөлдөр Монгол улсын тамхины хяналтын тухай хуулийг ДЭМБ-ын тамхины хяналтын суурь конвенцтай нийцүүлэн боловсронгуй болгох хэрэгцээ шаардлага, үндэслэл үүнтэй холбоотой гарах нийгэм эдийн засгийн эерэг үр нөлөөг олон нийт, бодлого боловсруулагчдад ухуулан таниулах явдал юм.
А.ЦЭРЭНДУЛАМ