Бүгд Найрамдах Беларусь Улсын Зэвсэгт хүчний Жанжин штабын даргын урилгаар Монгол Улсын Зэвсэгт хүчний Жанжин штабын дарга дэслэгч генерал Д.Даваа 2017 оны 5 дугаар сарын 19-22-ны өдрүүдэд БНБелУ-д албан ёсны айлчлал хийлээ.
Дэслэгч генерал Д.Даваа БНБелУ-ын Зэвсэгт хүчний Жанжин штабын дарга, Батлан хамгаалахын нэгдүгээр орлогч сайд хошууч генерал О.А.Белоконевтой хийсэн уулзалтаар хэлэлцээ хийж хоёр улсын цэргийн болон цэрэг-техникийн хамтын ажиллагааны асуудлаар санал солилцсон байна.
Хоёр талын хамтын ажиллагааг харилцан сонирхсон чиглэлээр хөгжүүлэх өргөн боломж байгааг талууд тэмдэглэв. Мөн энэ үеэр БНБелУ-ын Батлан хамгаалахын сайд дэслэгч генерал А.А.Равков Монгол Улсын Зэвсэгт хүчний Жанжин штабын дарга Д.Давааг хүлээн авч уулзлаа. Дэслэгч генерал Д.Даваа тэргүүтэй төлөөлөгчид энэ өдрүүдэд Минск хотноо нээгдсэн Зэвсэглэл, техникийн "МИЛЭКС-2017" олон улсын үзэсгэлэнд оролцож, БНБелУ-ын Цэрэг-аж үйлдвэрийн улсын хорооны нэгдүгээр орлогч дарга И.М. Демиденко, "Белспецвнештехника" компаний удирдлага болон албаны бусад хүмүүстэй уулзлаа.
ЭХ СУРВАЛЖ:БХЯ
