Нийгэм маань бүхэлдээ ядуурал, ажилгүйдэлд автжээ. Иргэд маань айдаст автсан. Аргаа бараад, хэдхэн зоос олохын төлөө хар тамхины тээвэрлэгч хийж, амиа золиосолж байна. Мөнгийг шүтдэг нийгэмд ард иргэд сөгджээ. Эх орондоо эзэн нь болж, эрүүл саруул орчинд амьдрах эрхээ эдэлж чадахгүйд хүрсэн байна. Монголчууд амьдрахын эрхээр сарын 10-30 хувийн хүүтэй зээл авч, улам сүйрч байна. 2 сая төгрөгний зээл авсаны төлөө банкинд шахуулж орох гарах газраа олохгүй явна.
Тэгтэл улсын хөрөнгийг үрэн таран хийж 10 тэрбум төгрөгөөр Казинод тоглосон эрхмүүд ял зэмгүй жаргалтай явна. Энэ шударга явдал уу? Ажилгүйдэл, ядуурал гүнзгийрч улс орны үндэсний аюулгүй байдалд нөлөөлөх хэмжээнд хүрчээ. Монголын ирээдүй бидний нуруун дээр байна. Тэгэхээр тэмцэе. Би 10 жил тэмцсэн. Дахиад 10 жил тэмцэхэд бэлэн байна. Та бүхнийг Хүний төлөө намыг дэмжихийг уриалж байна. Ингэж Хүний төлөө намын дарга хуульч Бат-Ялалт талбай дээр болсон цуглааныхаа үеэр ард иргэдэд хандаж хэллээ.
Ц.ХИШГЭЭ