УИХ-ын гишүүн Л.Цог, Г.Уянга нар бүлгээсээ гарсан нь УИХ-ын дэд даргын суудлыг О.Баасанхүүд зүгээр тавиад өгсөнтэй ижил шахуу юм болов. Харин О.Баасанхүү өөрөө бүлгээсээ гарвал Засгийн газар унах хэмжээний цоожинд сууж байгаагаа соргогоор мэдэрч том том дуугарч эхлэв. Тэрээр Н.Энхбаярт би Г.Шийлэгдамбыг Ерөнхий нарийн бичгийн даргаас нь чөлөөл мөн бүлгийн даргаа соль гэхчилэн хэлж сануулж байсан, миний үгэнд ороогүйнхээ горыг одоо өөрөө амсч байна хэмээн мэдэгдэв. Тэр ийнхүү намынхаа зөнч Ванга байснаа хэлээд зогсохгүй Монголын ард түмэн Ч.Сайханбилэгтэйгээ сонгуульд орно гэж байгаа бол бүлгээсээ гарахгүй хэмээн шантааж шахуу зүйлийг ярив аа. Түүгээр ч зогсохгүй Шадар сайдын суудлыг “юу нь гоё байгаа юм, би УИХ-д орж ирээд хамгийн том албан тушаалыг хашсан” хэмээн бүлт үсэрч харин намайг Эрүүл мэндийн сайд болговол би бэлэн гэхдээ Ч.Сайханбилэгтэй нэг баг болж ажиллахгүй хэмээн “даам” гарав.
Х. АЯЛГУУ