Шведийн домогт Абба хамтлаг 40 орчим жилийн дараа шинэ цомог гаргахаар болсноо өчигдөр зараллаа.
“Abba Voyage” гэх 10 дуутай цомог нь энэ оны арваннэгдүгээр сарын 5-нд худалдаалж эхлэх юм байна.
Хамтлаг 1982 онд тарснаасаа хойш дахин уран бүтээл гаргаагүй байсан. 2000 онд тэд дахин нэгдэж, аялан тоглолт зохион байгуулах $1 тэрбумын саналаас татгалзаж байсан гэдэг.
Лондон хотод болсон өчигдрийн виртуал хэвлэлийн хурлын үеэр хамтлагийн гишүүн Бёрн Ульвеюс, Бэнни Андерссон нар цомгийнхоо зарим дуунаас сонсгожээ.
Тэд өөрсдийн дижитал аваторуудаар бүтээсэн виртуал шоу тоглолтыг ирэх онд Лондон хотын нэг театрт үзүүлэхээр болсон байна. Хамтлагийн нэг цаг хагас үргэлжлэх тоглолт тавдугаар сарын 27-нд нээлтээ хийнэ. Тоглолтын тасалбар есдүгээр сарын 7-ны өдөр 21 паундын ($29) эхлэх үнээр борлуулагдаж эхлэх юм байна.
Аббагийн виртуал тоглолтын бичлэгийг бүтээх ажилд 850 гаруй хүн оролцож байгаа гэнэ. “Агнета, Фрида, Бэнни, Бёрн нар 160 камерны өмнө, мөн ижил тооны видео мэргэжилтнүүдийн өмнө тоглолтын бүх дуугаа таван долоо хоногийн турш бичүүлсэн. Энэ шоу нь Аббаг дуурайсан дөрвөн хүний тоглолт биш, жинхэнэ гишүүдийнх нь тоглолт байх болно” гэж шоуны продюсер Людвиг Андерссон ярьжээ.
Эх сурвалж: BBC, AFP
