Монголын рок, поп ертөнцийн акулууд болох Никитон, Харанга, Камертон хамтлагууд Төв Цэнгэлдэх Хүрээлэнд хамтарсан тоглолтоо энэ сарын 24-ны өдөр хийхээр бүх бэлтгэлээ хангаж, бэлтгэлдээ орсон. "Бидэнтэй хамт өнгөрөөх үдэш" (The night with us” ) нэртэй тоглолтын билет ч аль хэдийнээ борлогджээ. Гэвч Хотын захиргаанаас Улсын наадмын бэлтгэл ажилд саад боллоо гэх шалтгаанаар уг тоглолтыг цуцлах шийдвэрийг гаргасан нь тэдгээр хамтлагч, дуучдын фэнүүдийн урмыг хугалжээ. - Хоёр жил тоглолтоо өнжсөн. Фэнүүд маань ч биднийг санасан. Энэ бол хоёр талыг хүсэн хүлээсэн тоглолт. Бид аль хэдийнээ бэлтгэлээ орж, одоогоор 500 гаруй сая төгрөгийн бодит зардал зарцуулсан. Гэтэл Хотын удирдлагаас тоглолт хийх газрыг цуцаллаа. Уран бүтээлчид, тэдний ард буй олон зуун хүнтэй багийн ажлыг үнэгүйдүүлж буй энэхүү шийдвэрээ эргэн харахыг Хотын удирдлагаас шаардаж байна гэж Харангын Чука мэдэгдлээ.
