Энэ амралтын өдөр Богд-Уулын Нүхтийн ам руу салхилахаар гарлаа. Уул өөд хэсэгхэн алхахад ойд ямар нэгэн юм цохих мэт битүү дуу сонсогдож байна. Тэр дууг чиглэн алхсаар очтол самар түүж байгаа нэг гэр бүлийн хоёртой таарлаа.
Нийслэлийн ойролцоо тэр дундаа Дархан цаазат бүсэд самар жимс түүх хориотой.
Гэвч Богд-Ууланд самар түүж байгаа иргэд энэ хоёроор зогсохгүй олон байна. Бидний цаана 3 залуу майхантайгаа буусан байгаа.
Бид хоёр ч майхнаа барьчихаад самраа түүж явна гэлээ.
Ах эгч хоёр 8 сарын сүүлээс эхлээд өдөр бүр самар түүж байгаа гэнэ.
Жижиг майхантай отоглож буугаад өдөрт 2-3 шуудай самар түүн цайруулаад орой нь хот руу орж килограммыг нь 3000-3500 хооронд бөөндөж зарчихаад өглөө нь дахин уул руугаа гардаг байна. Хууль журам яривал энэ хоёрыг буруутгамаар.
Гэвч өнөөдөр 40-50 насны хүмүүст ажлын байр хомс байгаа нь байгалийн хишиг хүртэж хэсэг хугацаанд ч амьжиргаагаа залгуулах бодит байдалтай тулж байна. Самар түүсэн хүн бүр ой сүйтгэж, хог тариад байдаг биш л бололтой. Ийм л хүмүүс уул хадаар явж самар жимс түүж яваа.
Ах эгч хоёрын тухайд нөхөр нь гараар хийсэн модон мунаа мөрлөн уулаар алхаж самартай байж болох хуш модыг мунаар доргион цохиж унасан боргоцойг нь эхнэр нь түүж савлана. Хүчтэйхэн цохиж доргиохын тулд нарийн оосроос эхнэр нь татаж дэмнэнэ.
"Залуучууд модны мөчрийг нь гэмтээж, авирч хугалаад байх юм аа. Уг нь иймэрхүү муна хийгээд цохиж доргиогоод авчихвал мод гэмтэхгүй гэж хэлэх л юм. Даанч модонд нь авирч түүх нь илүү их олдоцтой шүү дээ гээд залуучууд үгэнд орохгүй юм" гэж ах хэлж байна.
Хамт хэсэг явж хуш мод мундаж боргоцой түүж үзлээ. Дурандаа хийх ажил ч ёстой биш юм. Үүрч яваа нойтон модоор хийсэн муна нэлээн хүнд. Хамт оосроос нь таталцаж мод доргиох нь ч амар биш юм. Хангай дэлхийн хишиг юм хамаагүй сүйтгэчихэлгүй, хоногийн хоолоо залгуулаад л байна гэх ах эгч хоёрын амьдрал Богд-Уулын самарчдын үнэн төрх аж.
Л.ГАНТУЯА