2016 оны УИХ болон НИТХ-ын сонгуулийн үеийн хэвлэл мэдээллийн мониторингийн судалгааг Хэвлэлийн Хүрээлэнгээс Олон Улсын Хүрээлэнгийн дэмжлэгтэйгээр хэрэгжүүлсэн судалгааны дүнг танилцууллаа.
Өдөр тутмын 5 сонин, долоо хоног тутмын 1 сонин, мэдээллийн 5 сайтын 32 хоногийн мэдээлэлд мониторинг хийсэн байна.
Мөн 20 нэр дэвшигчийн фэйсбүүк аккаунт, 20 нэр дэвшигчийн твиттер аккаунт, улс төрийн чиглэлээр дагнан бичдэг долоон сэтгүүлчийн твиттер болон фэйсбүүк аккаунтын мэдээлэлд ажиглалт хийжээ.
Жижиг намууд болон бие даагчдын төлөөлөл твиттерийг илүүтэй ашигласан бол том намууд, ялангуяа АН фэйсбүүкт илүүтэй анхаарлаа хандуулан сонгуулийн сурталчилгаагаа хийсэн юм. Сонгуулийн үеэр хэвлэмэл сонинууд олон нийтэд мэдээлэх, танин мэдүүлэх үүргээ биелүүлэхэд түлхүү анхаарсан бол цахим мэдээллийн хэрэгсэл болон нийгмийн мэдээллийн сүлжээ “сурталчилгааны индэр” байх үүргээ илүүтэй гүйцэтгэжээ хэмээн ХХ-гийн Гүйцэтгэх захирал М.Мөнхмандах дүгнэлээ.
Энэ удаагийн мониторинг нь сонгуулийн сурталчилгааны өмнөх үеийг сонгуулийн сурталчилгаа албан ёсоор эхэлсэн үеийн мэдээлэлтэй жишихээс гадна сонины мониторингийн дүнг 2012 оны үр дүнтэй харьцуулснаараа онцлог байв.
О.НАНСАЛМАА