Энэ шуургыг хэн, хаанаас тавиад байна вэ? гэтэл саяхан БТСХГ-ын газрын даргаар томилогдсон Жаргалсайхан, өөрийг нь энэ албан тушаалд томилсон шадар сайд Оюунбаатарын даалгавраар хийж байгаа юм байна. Сурсан зангаараа, бүтэц зохион байгуулалтын өөрчлөлт нэрийн дор төрийн мэргэшсэн албан хаагчдыг хоморголон халж, албан тушаалын сэлгээ томилгоо хийжээ. Шадар сайд Оюунбаатар нь "Урамтай шатрын холбооны" тэргүүнээр ажилладаг. Тэр урамтай нүүдэл хийж, тус холбооныхоо ерөнхий нарийн бичгийн дарга, УИХ-ын гишүүн асан Н.Түвшинтөгсийн хүү Т.Батзоригийг БТСХГ-ын санхүү, төсвийн хэлтсийн даргаар тавьжээ. Яахаараа нийгмийн ухааны чиглэлийн хүнийг санхүү, төсвийн хэлтсийн даргаар дур мэдэн тавьдаг байна аа, сайд аа. Энэ урамтай нүүдлийг дуурайн, шинэ дарга Жаргалсайхан нь БТСХГ-ын үндэсний шигшээ багийн албаны дарга Ц.Одонбаяр болон туршлагатай мэргэжилтэн, Нийтийн биеийн тамир спортын албаны дарга Тунгалаг нарыг үүрэгт ажлаа өгөхийг хууль бусаар тулгасан байна.
Тэдний оронд, өөрийнхөө үүсгэн байгуулсан Модон бөмбөгийн холбооны е/н/б/-ийн дарга Эрдэнэтуяа болон Оюутны холбооныхоо тэргүүлэгч гишүүн Б.Оюун нарыг томилжээ. Шинээр томилогдсон Жаргалсайхан, түүнийг турхирч байгаа Оюунбаатар нарын энэ үйлдэл хаяанд ирсэн Риогийн олимпод монгол тамирчид хэрхэн оролцоход санаа нь огт зовохгүй байна гэж үзэж болохоор гэж мэргэжилтнүүд санаа зовсноо нуухгүй байна. Өмнө нь Соёл, спорт, аялал жуулчлалын яамны БТСХГ-ын дарга хийж байхдаа, Засгийн газраар хууль бус шийдвэр гаргуулан, мөнгөн шагналыг хавтгайруулан олгосны балаг ч арилаагүй байгаа аж. Төсөвлөсөн мөнгө сох дутаж, дэлхийд амжилт үзүүлсэн Монголын тамирчид, дасгалжуулагчид одоо хүртэл мөнгөн урамшууллаа авч чадахгүй явна. Энэ мөнгийг сох дутаасан автор нь Жаргалсайхан гэдэг. Тэрбум төгрөгийн асуудал үүсээд ирэхэд, сайн дураараа ажлаа өгөөд зугтаасныг тамирчид ярьж хэлж эхэллээ.
Тэр яагаад дахиад томилогдов гэтэл, намын дарга Намбарын хүү Энхбаярт сайн үйлчилсэнд байгаа гэж ойрын эх сурвалж мэдээлж байна. 2015 оны Кванжугийн (Солонгосын) Оюутны спортын наадмын үеэр Солонгос улсад амьдарч байсан Н.Энхбаярт найр тавьж, БТСХГ-ын тусгагдсан зардлаар VIP үйлчилгээг үзүүлсний шан харамжаа ийнхүү өнөөдөр хүртлээ гэж хэлэх нэгэн байна. Тэрбээр өмнө нь ч асуудал үүсэж, сахилга алдаж халагдаж байсан хүнээ ерөнхий нягтлан бодогчоор дахин томиллоо.
Энэ бүхэн нь мэргэжлийн байгууллагыг шагналын журмаар, найз нөхдөдөө тал засах, найр тавих замаар булаан авлаа гэж хэлж болохоор харагдана. Бид нар ингэж л салбараа сүйрүүлдэг. Шударга ёс тогтооно гэж гарч ирсэн "Шударга ёс" эвслийн бас нэгэн шударга бус шуурга спортын салбарыг дайрлаа.
Эрээ цээргүй энэ үйлдлийг хэн зогсоох вэ? Хүнээс хамаарсан бүтцээс хэзээ салах вэ? Олимпод амжилт үзүүлэх тамирчид, мэргэжилтнүүд хэрэгтэй юу?, төрийн мөнгийг намын гишүүд, тойрон хүрээлэгчдэдээ тараах намын албан тушаалтнууд хэрэгтэй юу? Ямар ч гэсэн тамирчид, мэргэжилтнүүд хулгай маягаар ажилладаг удирдлагынхаа шийдвэрийг эсэргүүцэж, шүүхэд хандахаар боллоо.
Д.ЦЭНД
