Өнөөдөр Казахстаны Алматы хотноо олон улсын жүдо бөхийн холбооны олимпийн эрхийн оноо олгох сүүлийн "Гран При" тэмцээн эхэлнэ. Тус тэмцээнд манай улсаас 10 тамирчин оролцох бөгөөд ОУХМ Гантөмөрийн Дашдаваагийн удирдлагад барилдах юм. Уг нь бол манай улсаас 11 тамирчин оролцох байснаас залуучуудын ДАШТ-ний хошой мөнгөн медальт Ц.Цогтбаатар жиндээ орж чадаагүйн улмаас тэмцээнээс хасагдсан байна.
Тэмцээн Улаанбаатарын цагаар 12:00 цагт эхэлнэ. Алматыд нийт 83 орны 250 эрэгтэй, 146 эмэгтэй, нийт 396 тамирчин өрсөлдөхөөр болоод байна. Медалийн төлөөх барилдааныг ETV, C1, SPS телевизүүдээр шууд дамжуулах юм байна.
А.САЯН