Европын лигт Испаничууд давамгайлах болоод удаж байна. Севилла 3:1 Ливерпуль гэсэн харьцаагаар Евролиги-2016 эхний цом Испанийг зорилоо. Боруссия Дортмундын хуучин дасгалжуулагч Клоппын удирдсан Ливерпуль цомын сэнжнээс нь атгаж аваад л алдлаа гэж Германы хэвлэлд бичиж байна. Нэгдүгээр үе бүхэлдээ, Ливерпульчууд давамгайлсан. Гоол ч орсон. Хоёрдугаар үеийн эхний довтолгоо харьцааг 1:1 болгосон. Түүнээс хойш 2 ч гоол алдаж хожигдсон.
Гэхдээ шүүгчийн оролцоотойгоор Испаничууд ялсан гэж хөлбөмбөгийн сэтгүүлчид бичиж байна. Хаалганы өмнө, 16 дотор гурван ч удаагийн Англичуудын эвгүй довтолгоог Испанийн тоглогчид гараараа тасалсныг шүүгчид хараагүй мэт өнгөрөөсөн нь хоёрдугаар үеийн тоглолтод шууд нөлөөллөө. Хөлбөмбөг биш, гарбөмбөг тоглолоо гэж бичихэд хүргэв. Клоппын хүүхдүүд ялалтаа алдсан ч, мянга мянган дэмжигчдийнхээ сэтгэлд ялалтын дөлийг бадраалаа гэж бичихээ сэтгүүлчид мартсангүй. Севилла 5 дахь цомоо, гурав дахь дараалсан ялалтын рекордоо тогтоолоо.
Энэ сарын 28-нд Атлетико Мадрид : Реал Мадрид аваргуудын лигийн цомын төлөөх тоглолтоо хийнэ. Цом Испани луу, тэр тусмаа Мадрид хот руу явах нь тодорхой боллоо. Энэ жилийн аваргын цомыг РЕАЛ биш АТЛЕТИКО авна гэж хөлбөмбөгийн хорхойтнууд хүсэн хүлээж байна.
Э.ЦЭНД