Аваргуудын цомын аваргад Атлетико Мадридыг ялна гэж санал асуулгад оролцогчдын 70% нь хэлж байлаа. Тэр дундаас ганцхан хүн тэмцээн хэрхэн өндөрлөхийг харсан мэт хэллээ. Тэр бол Голландын алдарт хөлбөмбөгчин Рууд Гуллит байлаа.
Реал Мадрид 1:1 Атлетико Мадрид. Ингэж тэнцэнэ. Нэмэлт цагт өөрчлөлт орохгүй. Харин 11 цохилтоор цомын эзэн тодорно. 5:3 гэсэн харьцаагаар Реал Мадридынхан өрсөлдөгчөө буулгаж авна гэж тэр урьдчилан таасан байлаа.
Түүнээс та яагаад ингэж хэлсэн бэ? гэсэн асуултад ;
-Зүгээр л, тэгэх юм шиг санагдсан гэж Гуллит хариулсныг европын хэвлэлийнхэн шуугиулж байна. Атлетико Мадридын хувьд боломж байсан. Тэд эхний гоолыг 15 дахь минутад алдсан ч, тоглолтын санаачилгыг алдаагүй. Тоглолтын 80 дахь минутад тооны харьцааг тэнцүүлж чадсан. Түүний өмнө Торресийг 16 дотор унагасны төлөө 11 метрийн торгуулийн цохилт өгсөн. Түүнийг Атлетико ашиглаж, гоолдож чадсан бол толгой гудайн гэр гэр лүүгээ харихгүй байсан.
Гэвч Реалын тоглогч, дэмжигчдийг аз ивээн тэтгэсэн. Цохисон бөмбөг нь шон мөргөж Атлетикчуудын урмыг хугалсан гэж хэлж болно. Нэмэлт цагийн дараа, 11 метрийн торгуулийн цохилт, хөлбөмбөгчдийн нервийг сорьсон. Атлетикчууд нервээ барьж чадаагүй бол, Реалчууд төгсгөлөө тун тайван, итгэлтэй хийлээ.
Харьцаа 5:3. Роналдо 3 дахь удаагаа Аваргуудын лигийн цомын аварга боллоо. "Торгуулийн цохилт бол аз юм. Лотерей гэж хэлж болно. Бид илүү туршлагатай баг гэдгээ харууллаа. Одоо улирал дууслаа. Сайхан амарна. Дараа нь Евро-2016 биднийг хүлээж байна" гэж тэр сэтгэгдлээсээ хуваалцлаа.
Э.ЦЭНД
