Алдарт теннисчин Мария Шарапова энэ оны Австралийн нээлттэй тэмцээний үеэр хориотой эм хэрэглэсэн нь сэргээшийн шинжилгээгээр тогтоогдсон. Тэгвэл Олон улсын талбайн теннисний холбоо /ITF/ өчигдөр хуралдаж, түүний тэмцээнд оролцох эрхийг хоёр жилээр хассан байна. Мария Шарапова энэхүү шийдвэрийг хүлээн зөвшөөрөхгүй гэдгээ мэдэгдэж “Спортын арбитрын шүүх”-д давж заалдана хэмээн мэдэгдэл хийжээ. Тэрбээр сэргээш илэрсний дараагаар мэдэгдэл хийж гэр бүлийн эмчийн бичиж өгсөн жорын дагуу энэ эмийг 10 жилийн турш ууж хэрэглэж байгаагаа хүлээн зөвшөөрсөн юм. Гэтэл уг эмийг 2016 оны 1 дүгээр сарын 1-нд Дэлхийн сэргээштэй тэмцэх байгууллагаас /WADA/ гаргасан хориотой эмийн жагсаалтад оруулсан байдаг.
Дэлхийн хамгийн баян теннисчдийн нэг Мариа Шарапова сэргээшийн дуулианаас болж нэр хүнд нь буурч, “Nike”, “Tag Heuer” зэрэг харилцагч компаниуд нь түүнээс нүүрээ буруулаад эхэлсэн.
А.САЯН