Нийслэлийн Боловсролын газраас ЕБС-ийн нэгдүгээр ангийн элсэлт болон “Эрдмийн баяр”-ын талаар мэдээлэл хийлээ. Ирэх намар нэгдүгээр ангид 27 мянга гаруй хүүхэд элсэх судалгаа байгаа бөгөөд элсэлтийг наймдугаар сарын 22-26-ны өдрүүдэд явуулахаар болжээ. Мөн хоёр дүүргийн заагт байрладаг харьяа сургууль, цэцэрлэгээсээ хол байрладаг хүүхдүүдийн асуудлыг шийдвэрлэж, дүүрэг хамаарахгүйгээр ойр байрлах сургууль, цэцэрлэгт хамруулахаар шийдвэрлэсэн байна.
Ингэснээр Баянгол дүүргийн харьяанд байдаг “Нарны хороолол”, “Алтай хотхон”-ны хүүхдүүд Хан-Уул дүүргийн цэцэрлэг, сургуульд хамрагдах боломжтой болж буй юм. Түүнчлэн цэцэрлэгийн төгсөлтийн баяр, нэгдүгээр ангийн Үсэглэлийн баярын арга хэмжээг тайлант өдөрлөг, 9, 12 дугаар ангийн сурагчдын “Эрдмийн баяр”-ыг “Боловсролын баримт бичиг гардуулах ёслол” болгон нэгдсэн байдлаар тэмдэглэх шийдвэрийг гаргасан байна. Нийслэлийн Боловсролын газраас Үсэглэлийн баяр, Эрдмийн баярыг сургууль, анги бүр дур мэдэн хийхгүй байх, нийслэлийн ногоон бүсэд аялж, зугаалах болоод эцэг эхчүүдээс хавтгайруулан мөнгө хураахгүй байхыг анхаарууллаа.
А.САЯН